8.25 奧運完滿結束

一連16日既奧運終於都完喇,對於運動不太熱衷,有朋友叫去玩既 都會去既,其實每屆都會睇,唔知係咪今次係北京攪呢,opening真係好好睇,好有心思,咁多項目都好好睇,仲睇到好鬼緊張,又尖叫,又拍掌,又dum 地咁, 排球,藍球,羽毛球,乒乓波都鍾意睇,咁多項目中原因最唔like既係足球添

今屆令人難忘既唔知會唔會係............游水快過我行路既菲比斯呢??

好希望下屆中國女排可能再上一層樓,林丹連任,張怡寧三連任, 男藍攞牌, 咁再加埋夢幻隊就好lu

8.21 醫生我來了

呢排唔知做咩周身病痛,都係D舊患(腳掌,背脊,肩膀),不過今次痛D,有時郁吓隻手都痛痛地,睇醫生又無咩用咁,都係自己貼吓藥膏布,有時行都痛痛地添,唔通真係老人家病痛都多啲既。

剛剛既星期一起身發現隻眼紅曬,好似人地既紅眼症咁,睇嘢仲朦朦地,到星期二仲要腫埋添(同事發現),有同事仲問我 係咪喊添, 其實都諗住去睇醫生架喇,但要去PT,再遲吓先喇,可能會自己好番呢,到尋日都仲未好,唯有去睇喇,我都有諗過不如睇普通科架喇,無咁貴丫嗎,睇一睇幾舊 水架...

最後我都去咗睇專科,今次個醫生好細心,幫我check曬2隻眼,連視網膜都check埋,好彩只係眼皮發炎,應該好快好番既,不過其他地方就真係無計仔....

8.18 死佬日記

今日去咗睇"武紀勇"既死佬日記,其實去之前都唔知講咩,只係上 次睇完"喝采"知道有呢個劇,咁又唔貴,所以大家再去一次,原來係講男女大不同,內容都幾抵死好笑,聽落又覺得好近咁喎,成日都會發生係添,不過又好似好 難企另一個方面諗,如果個個人都可以做到好似佢咁講既,將來真係幾有用既。

又再期待下次既"再見理想",又心郁郁想去睇司琪姐套劇添,有無人都想去睇呀?

8.6 8號風球

今日真係打得成風喎,尋日仲同同事講緊點都要等到8點仲未打風先出門口返工,要同經理請2個鐘假,點知好早就宣佈咗打得成風,可以瞓晏D真係好喇,不過到下晝就開始悶悶地喇,所以一口氣寫咗好多篇,一直都想快D寫,但又想upload D相,所以咪咁耐囉。

依家身邊有好多朋友都玩FACEBOOK,係好耐之前,仲未有咁多人知道既時候,已經有朋友叫我開返個,唔知點解唔想開囉,豬仔&豬姐今日又叫我開喇

等我再諗吓先喇,成日對住部電腦都好悶架嗎,不如出來玩仲好喇

唔記得咗添,上星期日剛剛去咗Daisy屋企玩,佢地買咗套棋,好好玩架,上次去玩具x斗城行既時間都想買D呢類啱幾個朋友上來屋企或者同屋企人一齊玩,不過佢套棋都幾貴架。等我再SEARCH吓有咩可以買返屋企看門口先。

8.4 跳舞班

今晚要去Kennis攪既跳舞班,佢請咗一位朋友教我地,呢位老師 既職業係專業舞蹈員,佢教既係我地平時係電視或者演唱會見到既, 尖尖都有跟我一齊去跳, 學員總共有30幾位,每堂成個幾鐘,不過時間都過得好快,可能唔悶喇,時間就過得好快,上堂既地方係跳舞用既,所以其中一面全部都係鏡,所以會見到自己跳 舞個樣,真係幾好笑因為跳得好核突...

年紀真係大喇, 平時又少運動喇,跳完後兩日大脾仲有少少軟及痛添,仲有幾堂要加油先得喇

8.2 喝采

今日去睇音樂劇"喝采",係我第一次去睇呢類型既嘢,好期待呀

呢個劇係用咗"哥哥"&"陳百強"既歌串連成一個圍繞住3個年青人既成長故事

套劇既歌大部份都唔係我既年代,不過佢地實在太紅喇, 好多歌都真係耳熟能詳,仲要首首都好好聽,導演將佢地既歌編排亦好好,所以好連貫,有笑位,仲有感動位添

仲有呀,佢地三個主角真係唱得好好聽,開場既時候我仲以為放碟添,後來發現係唱現場,唔知係咪太好聽呢,攪到我有D亂,不過阿珊勁呀,聽到佢地有漏及遲入。

睇完呢個劇發現雖然唔係咩大明星或者歌星,不過佢地都有吸引人入場睇既動力,因為我地幾個已經買咗第二場既飛睇喇,又一次既期待。

8月既場次..............................

9月既場次

 

呢兩場都係去睇"渴采"時知道既,唔知睇完呢兩場後又會唔會再發現其他引我地去睇既呢. . .

8.1 生日宴

8月一開始又係食既時候,因為連續有兩個朋友生日,今晚係第一餐, 我地去咗一間之前都有朋友介紹過既意大利餐廳度食飯,今晚終於去試喇,呢度又係好多好既評語,因為公司個SERVER剛整好,所以今晚OT咗一陣,去到個 商場咁啱洪卓立係度出席活動,所以有好多FANS係度尖叫不過我就見佢唔到喇。

去到餐廳佢地已經叫咗嘢食喇, 味道又真係唔錯既,不過就細碟咗少少,咁都食得飽既,後來大家見咁早就去咗食多碗"八記"。

聽日去睇我人生第一次音樂劇,呢個係朋友介紹話好睇既,咁咪一齊去睇囉

7.23 甜品大餐

尋日係阿WING生日,我地打算去食甜品buffet同佢慶祝, 但訂唔到位,況且主人家超鍾意食既,所以遲D都要等喇,攪到大家都好期待呢一日,除咗大家可以出來見吓面同傾計之外,仲可以試吓呢間餐廳,呢間餐廳既評語 好好架,仲唔貴添,今晚阿WING兩個妹好都一齊食,仲食得好開心添...

佢地兩個仲攞咗好多嘢食添,咁又係既樣樣都咁吸引,差唔多每樣都試過,整體都幾好味既

 

 

以下既每件都好細件架,都幾好味架,不過真係試唔曬

 

 

件件仲好靚添

 

 

不過有後遺症,就係食完第二日成日個人都好甜好流咁囉

今日係姐姐已生日,雖然我係屋企人應該慶舊曆既,但都已經習慣咗10幾年都會一班朋友出來食餐飯買份禮物仔一齊慶祝 吓,今次姐姐又揀咗之前去過既韓國菜館食,佢今次另外仲叫多一個朋友出來,原本約左7點既,不過佢地遲咗少少到,其中一個朋友好似餓鬼上身一樣係咁講:好 肚餓呀好肚餓呀,叫住嘢食住先喇,咁主人家未到,咁好難做架嗎

 咪叫住海鮮餅食住先喇,一日個餅未來,佢都不停叫,唔通佢又係肥妹鬼上身?

之後我地就去咗附近飲柸嘢,大家傾吓計咁,大家都傾得好開心添

聽日去剪頭髮,佢地個個都剪短咗,攪到我都心郁郁,想整個短+攣既,不過個結局係點,大家都知喇

7.6 長隆兩日遊

一直都好想去長隆睇動物,馬戲&去水上樂園玩,對上一次去既水上樂園好似係海洋公園嗰個lu,今次我地成家人一齊去,雖然第一日去睇動物既時候天氣唔好落雨,不過無損我去探佢地既意欲,佢地都好得意架. . .

因為落雨,長頸鹿同班馬都要入去避下,就算頭頂頂都無計仔喇

 

呢群係高山羊....好似

 

呢幾隻唔係平時係馬路嗰D來架,會走動架

 

佢地真係超懶,動物園有4隻架,不過隻隻都係瞓曬,佢地既生活真係寫意喇

夜晚去睇大馬戲,其實呢D對於我來講興趣唔大,不過當佢地既重頭戲一出,真係無得頂呀,我第一時間諗到阿珊& X拉奇藝坊,真係好睇到不得了,直情為咗佢地既演出一動一驚心,我返到香港仲不停同身邊朋友講真係真係好好好睇,簡直係難以形容。

因為太好睇,完全唔記得要影相

第二日去玩期待已久既水上樂園,膽小既我雖然樣樣都好想玩,但又驚死,不過都玩咗幾個既,都係要用水泡玩既,其中有 個GAME好似叫"合家歡,剛剛我地4個人可以玩,就係呢個GAME證明咗我對手真係短咗少少,佢要用2隻手扶住旁邊既帶,佢地個個都無我呢個問題,但我 就勉強叫扶到,雖然自己都知手短,但經過今次無辦法喇,我唯有認命喇

呢個行程雖然樣樣都好好玩,但又發生一件唔開心既事呀,就係當我攞部相機出來影低動物既時候,發現佢壞咗喇,呢D相全部都係用部電話影架,好傷心呀. . .