我.的.吃.喝.玩.樂: 7月 2007

2007-07-28

7.26 離不開

睇咗幾次中醫之後, 咳真係好好多,我都以為自己好番,仲覺得自己今次好勁,只係咳咗3個星期就好番曬,我今日lunch仲食咗柸紅豆冰添, 但好可惜既事又來喇就係係我食完柸豆冰既下午,就開始再咳喇

又要再去睇醫生同飲苦茶

2007-07-26

visited 12 states (5.33%)
Create your own visited map of The World
今晚突然之間好想睇吓自己係呢十幾年去咗幾多次旅行,去邊喇,同邊個去咁,大家可能會覺得好無聊,但我就覺得好得意咁。

第一次出國旅行係95/01/25,姐姐請我去既,嗰陣我都仲讀緊書,佢已經出來做咗幾年嘢喇,我地一行應該係7人浩浩蕩蕩咁去西歐,我仲記得我地係跟團捷旅,12日既西歐團,之後我地仲逗留係英國多一個星期,呢個旅程真係好開心,可能係第一次去旅行,之前逗留嗰陣係住係朋友度,D朋友仲車我地幾條友仔周圍去,好舒服同好好玩,好難忘既一個旅程。
2. 95/07/20~唔忘得喇,因為passport無咗出境記錄,最少逗留咗1個多月 - 英國
3. 98/03/28~04/01 - 曼谷
4. 98/10/04~10/07 - 星馬
5. 99/03/19~03/22 - 海南島
6. 99/06/27~07/01 - 台灣
7. 00/12/09~12/12 - 越南
8. 01/02/22~02/26 - 曼谷
9. 01/06/19~06/23 - 南韓
10. 01/09/15~09/21 - 東京/大阪
11. 02/05/17~05/20 - 東京
12. 02/10/10~10/14 - 曼谷
13. 03/05/01~05/05 - 東京
14. 03/08/10~08/16 - 華東
15. 03/10/03~10/07 - 布吉
16. 04/01/01~01/05 - 北海道
17. 04/07/10~07/13 - 台灣
18. 05/04/30~05/04 - 曼谷
19. 05/10/02~10/05 - 東京
20. 05/12/10~12/13 - 北京
21. 06/01/26~02/02 - 西安
22. 06/02/03~02/08 - 東京

除咗頭兩次去遠程之外,近呢十年都係東南亞(5次泰國,6次日本同2次台灣,其餘都只係去一次),

仲有好多時都係同屋企人去,前幾年都去得比較密,對上一次去旅行已經係1年半前既事,近幾年我都好鍾意去旅行同影吓相,我既技術當然係......無喇,不過數碼相機真係太方便,唔洗全部都曬,可以係電腦睇咗先再決定曬唔曬,所以我依家都幾鍾意影風景相(靚既都會曬),見到D咁靚既相,人都會開心D。

下次既目的地應該會係台灣,因為之前朋友去完玩,好似好好玩,好多嘢食同好多嘢買呀,攪到我都心郁郁。

但我最想去睇吓花同影相。

2007-07-23

7.23 麻煩人

星期一又係老細返香港既日子,通常都會扮吓勤力,因為今日大老細又落香港做嘢,所以佢要等埋佢一齊上大陸,所以都成3點幾先走,走之前仲交低叫我SEARCH吓MPF既嘢。

但麻煩人唔係我老細,佢對於我來講一D都唔煩。之前都有提過,嗰個衰人今日走去另一個同事度問佢公司D海報仲有無,嗰個同事又點會知丫,佢咪就係轉過頭過來問我,當然佢諗住我會攪喇,嗰衰人要10張不同款既海報,問來問去終於知道邊個負責(隔離公司既人),樓上公司同事點咗個叔仔攞落唻,點知嗰叔仔話好要佢由3樓攞海報落唻1樓算喇, 鬼叫問人攞嘢咩,都算喇,佢要10張,但人地只得4張,對方同我講9月會有新,到時再俾我地,我已經將全部通知佢,又過多一陣又問,有無相架,之前又話唔洗,依家又問,佢都係送上大陸之嗎,大陸買咪得囉,正煩人,得一想二

仲有呀,之前佢扮型坐係張枱度,攪到張枱爛咗,之前佢飲完柸咖啡隻柸又唔攞出去,張枱咪爛咗,隻柸就掉咗落地,佢只係放埋地下一邊,又唔執番出去,攪到成地咖啡又唔理,今日無人清潔,最後隻柸同個地下都係我去處理,成日都老馮咁,超衰格

仲有呀...張枱整唔到,要再加一D鐵架會好D,佢居然同我地講加膠水,仲話一定得,佢係唔係傻架,張枱係好重,而且人地係專門維修,當然知道用咩方法係最安全同最好,都唔知佢加咩衰意見

2007-07-22

7.21 手信

今日好開心呀因為收到一份好鍾意既手信,之前一直都想買但未睇啱,之前有同olivia去老尖睇過吓,但我鍾意個款,間shop又得中size,但我想買大,點知olivia去台灣睇到我想買大嗰個既款,佢就買咗來送俾我做手信喇,所以好開心呀...

今日我地約咗去旺角食lunch,佢話買咗手信俾我地,但我都無諗過佢會買咩架,咁我有朋友既朋友係英國,所以我就問吓佢地想唔想買袋,咁佢就即刻話唔洗喇,因為佢已經買咗喇....太好喇

真係好多謝佢呀

7.20 自助餐

今日又約咗朋友去食自助餐喇

因為朋友有折,所以就$150就ok喇,我地就浩浩蕩蕩一大班人去咗好遠既天水圍食buffet喇。

咁我未試過由觀塘入天水圍,所以一早就上網check吓點好最方便,有村巴同巴士,我最後都揀咗巴士,因為每個站有提示,咁有提示會好D,因為我唔識落車...但如果有下次又入天水圍,我一定唔會再坐巴士架, 因為實在太耐喇我坐咗成1.5個鐘,我呢排身體又唔係幾好,仲暈車浪添仲俾朋友教錯我落車,要再坐輕鐵...成3個站先到目的地。

2007-07-19

7.18 姐姐生日快樂

祝姐姐生日快樂

我地約咗朋友一齊又去食buffet,去咗美麗華樓下嗰間食,都幾多嘢食既,但就人太多喇。

姐姐要佩鏡片,所以佢就要咗呢個做禮物。

慘呀...星期五又去食buffet,由朋友開始通知我地佢要結婚,仲叫我地幫佢手做姐妹開始,就不停要慶祝,差唔多次次都係要大吃大喝。

但我又想去旅行呀但又諗唔到去邊度好,見朋友去完台灣又好似好好玩咁,但又已經去過好幾次,去日本又唔想,去大陸又水災...唉...真係攞來煩。

2007-07-17

7.16 打邊爐

今日原本打算放咗工去睇多次中醫,但今晚約咗朋友去打邊爐(有朋友生日),所以唯有聽晚先去得。

原本book咗有骨氣既,但後來同朋友傾傾吓,改咗去佐敦另一間都係打邊爐,朋友食開都覺得OK,又唔貴,佢又有嘢食(有朋友食素),我諗住6點鍾到走人, 打算坐巴士去,但可能身體唔係咁好,居然暈車浪,所以最後係旺角落咗車,再轉地鐵過佐敦,原來都諗住睇吓頂唔頂得住,都只係差少少就到喇,但都係唔得,因為已經想嘔,最終辛辛苦苦去到目的地喇, 但...真攪笑,間嘢執咗,朋友上星期一都仲去完食,咁我地再轉地方,最後去咗寧記食,嘢食就認真麻麻地,但地方都OK,因為無咩人。

聽日去做一年一次身體檢查,今晚仲去打邊爐添...

2007-07-16

7.15 炎熱

今個星期仲係咳,所以成個星期都無去做運動喇, 星期五晚終於都去咗睇中醫, 去到醫生嗰度佢食緊飯,要等成半個鐘,咁由無理由行到去唔睇架嗎,所以咪係附近行吓先囉,終於都等到喇, 亞醫生見我面紅紅,咪問我出面係唔係好熱囉, 我當然同佢講我未夠7點就到咗,但你食緊飯,所以係附近行吓,所以咪咁囉。飲咗幾劑藥,好似好咗D,但又未好曬囉,星期一都要再去睇多次先得。

因為爸爸整親隻腳,呢兩日都無出去幫手,所以我地今日中午都無一齊去飲茶,所以我地幾姐弟就一齊出去買嘢食返屋企大家食, 我地出去個陣正正中午, 太陽伯伯一D都無偷懶,好猛烈咁照住,所以我地行咗一陣就已經出曬汗, 之前都已經覺得今年夏天會好熱架喇, 但呢排下晝成日都有機會係屋企,所以真係感受到個隻"超熱",因為平時屋企下晝盡量都唔開冷氣,要俾部機休息吓。唉...呢個夏天點過呀?