6.24 聚會

今日瞓醒已經差不多1點係屋企食咗少少嘢,爸爸媽媽都話唔出街,所以我就去咗剪頭髮同做焗油因為之前電髮攪到D頭髮開曬叉,之前都一直諗緊再去電定整直佢, 但媽媽話我咁多開叉,點整都唔好睇,佢叫我去剪吓好仲好喎,所以咪去剪囉。

夜晚約咗之前讀日文既同學仔去食飯

聯 誼吓咁囉, 有我喇,Eddie&Friend,Cherie同埋Olivia,我見咁少人,所以就叫埋佢陪我一齊去, 之前Cherie話帶我地去食手打烏冬,但點知間舖頭星期日無開,所以我地最後去咗美麗華3樓嗰D舖頭食,D野食就好一般喇,不過都無所謂既,大家都係諗 住出來食吓飯同傾吓計姐,都算開心喇,下次再約

6.23 購物日

因為生日既關係,朋友仔會送禮物俾我但就要自己諗同買,之前一直都有諗買咩好

我個人又心多,所以一直都下定決心,樣樣都好似幾好咁喎,我就諗喇今日叫埋媽媽一齊去尖沙咀行街,順便去買我既"生日禮物"其實去老尖睇都係想買手袋, 一來朋友送, 二來都想買嗰個新既手袋...最後當然都買到喇, 我已經同朋友講咗,仲通知咗佢要將D錢入落個利是封內俾我,我又唔洗唔好意思, 而且又可以等我有需要既時候先攞出來用。

另外一份都要自己去買, 原本想買個環保袋去做GYM既時候用既,但又唔知點解揾唔度間SHOP,所以最後都買咗對鞋,原本我都諗買鞋好唔好既, 好似唔係幾好, 但媽媽又話我地都唔拜神,無咩所謂喎,所以都決定買咗喇。

今日好開心呀, 因為都買到自己想買同鍾意既嘢...太好喇

6.22 考試日

又到星期五喇, 代表今日要返學, 而且今日仲係考試

因為好快個course就讀完,我真係有溫吓書架,都溫咗幾日

但都唔係好識,仲有一part我唔知題目想點,最後都做到錯曬

白白無咗15分, 考完後miss張D卷分俾大家一齊對,對完後再分番俾自己睇吓,我計過架喇, 未包有幾part要由miss改,我只係得40幾分...有D唔開心添,雖然都應該唔會再讀,但都唔想D成績咁差架嗎

7.7 小休

今日原來約咗班朋友去朋友屋企打邊爐同打機, 但俾爸爸傳染咗D病菌,所以喉嚨有D痛,仲頭痛添,所以尋晚忍唔住去咗睇醫生,原本諗住食咗藥,好少少都會一齊去邊爐,但都無咩好轉,費時去到傳染俾人,所以最後都無去到...唉...今次仲好齊人添架

因為唔係幾舒服今日成日都無出過街, 晏畫都係媽媽買咗番屋企一齊食, 食咗少少藥, 又有少少風,好舒服咁就係廳到瞓咗。

6.21 生日快樂

今日又踏入另一個年頭喇

 

不過依然係2x

今日約咗班朋友去朗豪坊食Buffet,幾好食架,我地一邊食一邊傾計,好快就10點幾有朋友出年結婚所以近日都出多 咗來見面,每次都會講吓佢結婚既嘢,朋友結婚真係開心,今日仲有講叫我快D減肥,因為我要幫手做伴娘,食埋今個月就要努力減喇,唔係一陣就真係著唔落D衫 同唔見得人添。

近幾年既生日都係約D朋友出來食吓飯,好似無咩特別同新意咁, 雖然同朋友食飯都開心,但之前生日有時會有D驚喜,但近年都無喇,唔知係同朋友太熟,所以都習慣咗,出年一於要諗諗計仔,改變吓先得。

6.18 韓國燒

今日約咗心誠既同學去尖沙咀食韓國燒,唔係任食個D,係之前有朋友去過話OK,所以就襯生日既大日子約埋三五知己去試吓,我地都叫咗好多嘢食(牛肋骨, 豬肉,石頭飯, 海鮮煎餅,炸醬麵,人參雞湯,豆腐湯,炒粉絲,炒年糕,生菜...好似差唔多)我地有7個女仔,但都叫咗好多嘢食,所以大家都食到好飽。

今日係今年第二次慶祝生日,可以同咁多朋友慶祝,係一件幸福同快樂既事,真係多謝大家。

今日仲有一位好似一年見一次既舊同學(FION)一齊食飯,見到佢真係等如見到幸福。好替佢開心,揾到一個對佢咁好既人。

唔知我地同枱食飯個7個人, 下一個結婚既會唔會係Daisy呢???

6.17 父親節

今日係父親節上星期爸爸已經出聲問:丫...咩唔係今個星期父親節咩?亞媽答佢話下星期先係, 所以我地都唔敢有咩差池早幾日就開始問定爸爸想食咩

 

 

最後我揀咗中環"One Cafe"食LunchBuffet,之前都有朋友食過,都一般喇,只係$160咁上下,都係接受既範圍, 所以我地一家人就分咗3批人出發去中環喇。

第一批:媽媽,姐姐同莉莉...佢地有月票,所有先坐西鐵再轉地鐵

第二批:我同爸爸, 我地無月票,爸爸仲要買完馬仔先行得

第三批:弟弟自己一個人,因為媽媽唔記得帶嘢,弟弟要幫佢番屋企攞,唔係佢都會同我一齊全巴士既

食完Lunch之後,爸爸好心急要返屋企睇佢D朋友所以佢自己返屋企先,我地幾條友仔就去咗行街, 終於都去咗H&M,但....我無買到嘢...好開心咁同屋企人過咗一日。

6.16 打牌

今日唔洗返工,平時我會上晝去沙田跳NBS,但今日約咗朋友2點係 屯門,我怕唔夠時間,所以無去到, 我就較咗鬧鐘11點,但真係唔覺個鬧鐘有響,後來我個Friend真係醒,佢打來我屋企,我細佬接咗,佢同我細佬講佢約咗我兩點,叫佢叫我起身, 佢當然不負眾望喇, 我準時到達。

今日我地係約埋去打麻雀,我自己都唔知點解我會應承佢去打牌,我一年都唔知有無打十次(包括新年同屋企玩既),真係唔應該呀,仲輸咗我$200好可憐呀,好彩大嬴家請我食咗兩餐補吓數。

6.15 再次上學去

好快就到星期五, 又代表要返學, 今日終於都再次返學喇, 之前偷懶咗兩個星期, 今晚剛開始上堂既時侯,好似唔係好知點miss.講咩, 我只係無返兩堂,就好似mis.咗好多咁。

不過下半堂都好咗少少,下堂要考試喇, 唉...點算呀

我覺得依家有D同學返學都唔係學嘢,成堂係度傾計,Miss既然出到口叫佢唔好講咁多嘢,因為會影響到其他人同埋佢好嘈...

唔開心既日子

今日原本都幾好架, 約咗朋友去食buffet慶祝, 但點知一早就俾人話, 攪到我唔係幾開心。

件 事係咁既, 公司有個日本人之前叫我幫佢約打針, 我唔記得咗, 咁佢今個星期一再提我, 我話今個星期幫佢約喇, 咁我打算今日幫約醫生既時候, 諗住叫同事再幫我問吓佢係打流感定肝炎針,點知佢俾曬面色我同事睇, 話同一件事已經問過好多次, 唔洗我幫佢約,佢嗰個樣真係衰到唔可以再衰, 佢當時係完全唔想答我同事既提問, 我都知我係有唔啱, 但洗唔洗咁呀...好耐無人咁對我喇, 所以好唔開心囉。而且攪到同事都唔好受, 真係有D唔好意思囉。

過咗一陣, 有電話揾佢, 係我接既(公司同事幫手聽電話), 咁我咪通知佢有電話囉, 佢個陣同同事傾緊嘢, 我叫咗佢3次, 佢應都唔應我, 完全無反應, 平時佢會應吓你, 嘩...我諗:你洗唔洗咁樣呀, 依家咩事先。

同事仲話, 可能佢覺得我唔尊重佢, 佢平時鍾意扮大佬, 要人尊重佢, 可能咁樣, 同事話佢以第3者身份去問佢, 就算我唔啱, 都唔關佢事, 唔應該用咁既態度對佢喎。

佢真係我見過咁多個日本人或者人既最衰嗰一個。我諗無人衰得過佢架喇。

唉...攪到我今日心情好低落。

6.12 爸爸大日子

今日係一年一度既大日子, 就係我屋企至高無尚既爸爸生日, 我地一家約咗夜晚出去食飯, 原本我打算同屋企人一齊去食自助餐, 但爸爸點都唔肯, 佢話貴, 所以後來都係去食中菜喇, 之前睇雜誌介紹"德興"有個新菜單, 又平又全包, 所以就打算去試吓...我book咗7:30, 去到已經覺得怪架喇, 因為無咩人係度食, 都完全唔洗book添, 因為D人遲大到, 成8:30先齊人, 我坐咗成個鐘都無人理我, 平時第二間一定係咁問幾時落Order...等等

食食吓...唉...算喇, 好彩佢平,唔係真係死得人呀...無下次呀

今個星期日又係爸爸既日子, 都唔知去邊度食飯好呢??

6.12 爸爸大日子

今日係一年一度既大日子, 就係我屋企至高無尚既爸爸生日, 我地一家約咗夜晚出去食飯, 原本我打算同屋企人一齊去食自助餐, 但爸爸點都唔肯, 佢話貴, 所以後來都係去食中菜喇, 之前睇雜誌介紹"德興"有個新菜單, 又平又全包, 所以就打算去試吓...我book咗7:30, 去到已經覺得怪架喇, 因為無咩人係度食, 都完全唔洗book添, 因為D人遲大到, 成8:30先齊人, 我坐咗成個鐘都無人理我, 平時第二間一定係咁問幾時落Order...等等

食食吓...唉...算喇, 好彩佢平,唔係真係死得人呀...無下次呀

今個星期日又係爸爸既日子, 都唔知去邊度食飯好呢??

簡單的

都有一排無寫喇, 因為每日都簡簡單單咁過, 真係無咩值得寫低,近日煩憂著我既都應該係讀咩好,諗住報日文,但又唔知報咩好, 問咗幾個朋友都話應該報第3年既課程,但我又驚自己唔識, 仲有究竟應該報邊間學校呢真係煩死人喇!!

約咗多時既約會, 終於尋日都去咗,以前我地有7個人架,但因為有一年發生咗少少事,所以由7個變咗6個, 幾年後大家都慢慢忘記咗嗰件小事,所以再約埋一齊去咗朋友屋企, 原本打算係佢度BBQ, 但因為落雨所以出咗去燒,都OK架, 算係咁架喇,只係貴咗少少,成本100大元。

我地有個朋友出年年頭結婚,揾咗我地其中幾個做姐妹,我就要幫佢做伴娘, 都唔知點算好呀, 咁肥....,真係要再努力D減肥先得啦, 有個煩人已經好努力, 已經減咗成10幾磅喇, 都唔知係唔係人來架, 咁鬼快, 攪到我都有D壓力