第一件要解決既事

2010.01.30

今日終於出左雙糧同花紅， 雖然唔多但比舊年好，我已經好滿足架喇．．．

今日再同媽媽講咗我想留學既想法，佢應該好贊成，再計一計數，應該問題唔大，但未同爸爸正式咁講過，但媽媽話應該都ＯＫ～～

但首先要解決既問題唔係屋企人，而係我老細．．．

因為要同佢講我有呢個想法，同埋叫佢炒左我，唔係我根本唔夠錢去完成呢個計劃

點算？？真係放假前同佢講？？？？？

最後佢肯，又想佢到時先炒我，起碼可以出多幾個月糧

但又有無咁完美喎～～

留學講座

2010.01.30

來緊會再去2個留日講座

1. 2月7號 - 漢科

主要想去聽佢講吓"東京國際大學附屬日本語學校" 呢間學校係全日制既, 但當然唔係全部都係學日文, 好似仲要修其他科, 想去聽下

2. 3月20號 - Pasona

好多經佢攪留學既學校, 日本方面安排啲人來講解, 所以都去聽吓

開始計劃

2010.01.29

今日從新開blog是為咗盡量記低留學計劃

一切都仍在最初初初步

呢個計劃之前曾出現腦海, 但因為工作令我暫時放下

依家又可能因為工作, 又再次出現~~

*****************************************

月初已經去咗日x既留學講座, 得到一些資料

近日不繼上網睇咗好多留日既blog友

亦都知道好多, 真係幾感謝佢地既每個分享

遲多少少再去多一個講座,希望再知道更多

我諗最開始應該係揀學校

全日？半日？宿舍？

剩係呢幾樣都夠曬

煩．煩．煩．．．

2010.01.17 花膠大王

由上次同同學慶祝生日後, 都無咩點去街, 足足兩星期, 真係慳返唔少...

學老占話事計, 依家"慳得一毫得一毫", 原來已經唔再係一蚊喇

今朝好早起身, 媽媽話今晚去試吓"花膠大王", 我呢個衰女梗係問吓係咪媽媽請先喇...

 

整體幾好味, 又唔會好貴~~

10.01.18 咳~~~

姐姐近日咳, 我都已經同佢講咗千萬唔好傳俾我, 點知佢仲要專登係屋企傳播大量細菌

攪到我終於失守.....除咗我爸爸都加入埋我呢個大軍添

罪魁禍首............姐姐

10.01.09 蓮香居

每個星期六朝早都返日文班, 通常下晝就會同阿媽周圍去食, 本週之選

"蓮香居"

所以可以等埋爸爸一齊go go go

最想食返細個成日食既灌湯餃

點知點心阿姐話咁晏....無架喇

十級失望

呢類茶樓真係飲早茶既地方

 

10.01.03 生日飯

今日約咗心記幾位老友同"水姐"慶祝生日, 首先同佢落旺角買禮物先, 之後一齊行去食飯, 今晚我地去試食神D小姐介紹既峇里餐廳, 呢間餐廳裝修就麻麻架喇, 不過勝在味道好, 不過最攪笑都係D伙記, 我地行到熱熱地, 人又未齊, 咪諗住叫野飲住先囉, 點知個伙記話飲呢d野唔解渴架, 叫我地飲茶(唔洗錢個啲), 當然我地無理佢, 笑笑口咁叫左先喇~~

 

我地hehehaha咁又食完飯, 呢幾個識咗超過15年既同學聚會真係幾開心架~~

09.12.27 聖誕hea爆之旅

今日係呢個聖誕HEA爆之旅最後一日, 今日無起身去酒店食早餐, 改咗去試吓"南美咖啡", 不過個人認為好過明氣最大"峰大咖啡", 呢度又係好多本地台友幫襯

食完早餐, 我地就由西門町行去龍山寺, 買水姐買佢最LIKE既花生糖, 為咗佢呢幾包糖,我地行咗半個鐘架, 平時既我地多數會搭車, 因為今次全無行程,所以盡量都係行路, 不過又唔會好攰, 仲幾舒服添~~

買完糖後, 記得台灣同事力讚既"龍都冰館"食咗個超好味既既"花生湯"姐姐就飲咗柸真既蜂蜜苦丁汁, 不過漏食湯圓, 唯有下次補番~食糖水前我地仲食咗小籠包&豆漿

真係成肚都係....水呀....水呀.....水呀.....

之後就返西門町lu....又去行書局, 漫畫店, 終於幫細佬買咗書, 而我同姐姐又買齊自己想買既書....果然係文化界......娛樂方面......hahahahahaha~~~
買咗咁多書, 梗係放返酒店寄存先喇, 之後又去咗食lunch, 原本打算再食另一間燒肉, 點知又係全爆, 連等都無得等, 最後食咗間老店 - 美觀園 -

一早攞定部相機出來, 諗住影相, 點知都係食完先記得未影喎, 唯有吉碗都影張喇~~

食飽飽坐一陣就返酒店預備出機場, 落住毛毛雨, 但又唔想攞住D行李去搭捷運, 最後又揀咗行路落台北車站, 又可以順路去買胡椒包返香港做手信(細佬老婆鍾意食)
真係時間啱啱好, 去到車站唔洗等幾耐又有車去機場, 雖然要分開坐都無所謂, 反正牌係單人位, 國光啲巴士真係幾舒服架喎, 往機場途中胡椒包既香味成架車都聞到呀...攪到我都好想攞個出來食添~~
話咁快唔洗一個鐘就去到機場lu, 我地就即刻Check-In入去等, 反正都一鬼樣, 過埋關又去食,因為華航既飛機餐好唔掂, 我就食個最普通既肉醬意粉+蜜桃茶(好好味~~)

總括成個旅程不知食咗幾多餐, 反正就從未覺得餓喇~~
以下張相就係3日來兩個人買既全部野喇
漫畫書係(細佬(41本)+姐姐(12本), 姐姐既韓流雜誌, 我既日本雜誌 再加姐姐既日韓CD,DVD, 一啲學習外語書 + 2件Tee

咁就過完聖誕節假期lu~~

09.12.26 聖誕hea爆之旅

今朝係酒店食個普通既早餐後, 去尋找一下MIFFY既, 點知都係白行, 揾唔到, 咁之後唔覺意咁食到一間超好味既牛肉麵, 真係食咁多次最好味呢次, 好多本地人食添

之後就去旅遊書介紹既Coffee Shop飲返柸+件Home Made Cheese Cake, 雖然係旅遊書有介紹, 但又好多本地人來架喎, 仲要好多都係熟客添, 因為見個老板娘一野就問d客係咪要咩呀...好似知道曬咁, 間Coffee Shop係d小街度, 有d難揾, 我地坐taxi都去唔啱, 落咗車仲要問路添, 我當然用國語問喇, 點鬼知佢同我講台語, 仲講咗好耐添, 佢居然問我係咪馬來西亞來, 我梗係同佢講唔係喇, 香港友來架, 佢又變返講國語, 不過佢好熱情呀, 都帶我地行左一陣, 雖然行咗唔少路先來到, 不過都值得既

食完Coffee後就行去101打算睇戲及買手信lu, 唔知係咪新年關係, 俾我地遇到唔好睇既嘉年華, 見無咩行程咪又睇吓囉, 返正係香港都未睇過

嘩~~去到買飛個度, 我地做咗從來唔會係香港發生既事, 就係排咗成個鐘買戲飛喇

原來係台灣睇戲, 好鬼多Gift送, 我地今次送左本MemoPad, 指甲油及茶包

見未夠鐘入場, 姐姐就去食咗個韓式豆腐湯飯(超難食~~), 我就去睇吓雜誌, 之後去攞汽水,爆谷, 入場lu~

睇完戲去咗士林食"十全排骨+臭豆腐(姐姐)+唔好飲既果汁"

返到酒店時, 姐姐又話想去7仔買宵夜, 因為晚餐唔係食咗好多, 我地買咗少少"關東煮"+麻酒雞碗麵(呢個好正~簡直想買返香港食添