10.26 好友營(下集)

原來第二日先激烈, 雖然game唔多,但足以令我成身散曬

 

反原本一組有8個人, 因為隊員唔舒服要休息,所以係無得揀既情況下,唯有我出動

*** 反坦克***

呢個game以手腳係地上行(成個藍球場咁遠),當然唔會咁簡單就咁喇, 中間又要轉圈,又要經過阻礙, 我去到中間對手已經無力喇, 就係我太慢影響咗成組既成績,最後都完成咗我呢段既, 對我來講已經好叻架喇, 最慘就係過程中俾人影咗相, 肯定好樣衰呀

之後就係戰馬出動,又係因為唔夠人,又要出我, 大家都知架喇, 我唔輕架嗎, 要組員(咩)起我幾辛苦先我架, 但係呢個game真係忘我, 出到去咩都唔理,係咁對付敵人,原本我地組好勁架,一個都無死,但到最後,其餘幾組既生還者一齊攻擊我地,所以最後我地得返一隻戰馬, 係最後階段直情唔望對方, 剩係攞隻手出去打, 後來發現有人打到我啲牙喇, 另外出動既手仲有幾條戰績添之後都有個分享會既, 眼淺既我, 係雪雪分享時,終於忍唔住喇, 分享會就解散囉最後當然係係太陽伯伯下影大合照喇, 不過都影咗好耐,因為太多相機喇..
總結:今年好友營好玩,又難忘, 仲好感動添...
在此多謝辛苦咁耐既各委員

好靚既大樹

好整齊喎...

加插兩幅"香港日出"

呢兩幅都係有日玩通宵,等車時影既....

10.25 好友營(上集)

一年一度好友營, 今年係我第三年參加喇, 好期待呀

 

今年去粉嶺浸會園,呢個營地幾好,設施唔錯架, 仲有小食部添(有柸麵,雪條,汽水賣), 我地剩係買咗吃水飲...

第一日就已經玩咗幾個game,都有啲運動量架, 有估人名, 偷尾巴, 包剪揼,仲有水戰。今年比舊年濕得少,可能限制多咗喇, 又可能好彩,我地係第一組出戰,所以啲人未癲...

偷尾巴及包剪揼都係俾全部人熱吓身, 不過啲人都玩得好投入,有人爛拖鞋,爛衫,不過都好好開心既

包剪揼(輸既人俾人捉) -- 同行朋友行佢係第2回合就追住我唔放喇, 無面俾架...不過啱既,咁先好玩架喇, 最攪笑都係有1 round全組出剪,另一組就全部出揼, 唔洗捉都輸曬喇

夜晚仲取寶物及話劇添。取寶物由第二組勝出, 真係抵佢地架, 規例身體唔準過界,但佢地真係勁呀, 佢地好有團體精神, 後面組員協助攞寶物既組員係身體未出界攞到最多, 佢地真係括出去架, 成個身係曬地下, 一個字....勁,之後做話劇就做正我識嗰啲, 有人做得好正,超爆笑攪到我打到自己隻腳紅曬...

野玫瑰之戀 前傅 Part II

因為之後去睇音樂劇,所以去咗睇相關既電影,由王天林執導既"野玫瑰之戀"。

電影於1960年拍攝(好耐呀....未出世添...)黑白片。角色 : 一個表面好野好壞既歌女,失意既音樂教師到夜總會(女人都入得既)做琴手, 間接令失意琴手趺到深淵既舊同學"小劉",無佢既介紹,唔會入夜總會做事

內容 : 女主角因為一些事誤會音樂教師,從而要玩弄佢, 女主角與同事打賭於10日內令音樂教師愛上佢原本當然係想玩佢喇, 但最後每自己走上不歸路, 當中加入女主角對音樂教師既付出及女主角於60年代既敢作敢愛。

大家唔好以為60年拍既戲就會好悶喎, 我開頭都有少少驚既, 不過睇完又唔係喎, 衣著性感前衛,就算依家著都唔會過時,主角既思想都勇架,為咗佢值得付出既,都不惜一切,唯一攪笑既就係未婚妻,成日都係一個表情....就係做喊。

之後既座談會,大家都比較文靜提問較少,為咗豐富音樂劇,由原本電影得6首歌編排成18首歌

。

老實講, 我一睇完套電影,真係覺得音樂劑既導演勁呀, 選角一流 女主角由焦媛演出,佢既韻味完全啱做呢個角色, 對於音樂教師就唔知點解會揀高皓正做, 不過點都有導演既想法。最後當然係為咗支持陳建豪先去睇既

佢就勁喇集電影幾個角色於一身(唔係分飾),我開頭先誤會咗

後來提問時導演先將我既思想改正...

包括:介紹高皓正入去夜總會做喇, 暗戀焦媛, 彈大提琴...點都唔少得既唱歌部份喇

之後都有同Angus影相&俾上次去睇完樹盟影既相俾佢簽名(雖然簽到睇唔到咩未呀),不過都開心既, 於不知不覺間變咗小劇迷添, 唔知我地每次都要同佢影相,佢會唔會覺得我地好煩呢??有少少擔心

期待佢有好既演出

10.18 返工~~

昨日星期六居然要返公司,因為大老細要玩嘢, 香港寫字樓要執位,我地同事間估佢因為年初時執位不成功, 所以懷恨在心,佢今次終於成功喇, 不過就攪著我喇...又要整新layout,又要買傢具,又要安排整過啲電線...等等。

晏晝去咗西環探姑丈,佢之前入咗醫院成個月,依家去咗療養院,所以我地一家四口齊齊去睇吓佢, 雖然我地唔係成日見,但爸爸同佢大姐既感情太好喇, 所以感覺都好親架,見佢既面色都幾好, 只係瘦咗啲,希望佢快啲好返屋企, 咁樣姑媽都唔洗咁辛苦成日走來走好喇

10.14 "野玫瑰之戀" 前傳

今日終於部電腦都整好喇, 心情舒暢因為終於有機用, 可能做吓嘢。

姐姐安排咗遲啲去聽個講座,關於下月既約會...就係..."野玫瑰之戀"

之前曾拍過一套電影,主辦單位可能想大家知道係咩一回事, 所以特意安排個欣賞會播返之前套戲及大家傾吓計(我估,唔知係咪),我們決定去睇。

希望得喇

10.13 武俠梁祝

今日同姐姐,朋友仔一齊去支持吳尊第一次拍既電影"武俠梁祝",之前吳奇隆,楊采妮做既時候都有睇,仲喊到豬頭咁添但今次就無變豬頭,唔係套戲既問題,可能係我大個咗比較冷靜,所以都只係一兩嘢

咁點都係第一次指電影,仲有進步既空間,不過佢都已經好叻架喇,好多場都係親身上,值得佩服。

內容我就唔多講架喇, 俾個機會大家自己去睇, 成套戲有笑,有喊,有親情,愛情及友情。所以推薦大家去睇吓。

阿Sa同吳尊外形真係幾襯,最後一幕好感人但令我覺得好可惜。
唔知現實社會有無人都可以對自己愛既人無條件付出呢???

10.12 認識新朋友

星期日約咗成班朋友出來食飯慶祝生日, 咁啱咁橋又係媽媽新曆生日。

今日生日既朋友仲介紹咗一位新朋友俾我地識添。

登...登...登...登......唔係度講喇(知道既人就知架喇)

大家都好似幾開心, 我都係架,幾替佢地開心,我諗遲啲會熱鬧啲添

我諗下次見到佢既時候, 要摸吓佢抽吓水先得喇,機會一過咗就無架喇

10.11 再一次...樹盟

原本打算今日返Part Time既, 但尋晚為咗睇曬"這裡發現愛"好夜先瞓,所以今日再次要瞓晏啲。下晝約咗幾個志同道合既朋友去睇音樂劇......<樹盟>,由陳建豪,胡琳 魯文傑主演。由"渴彩" "死佬日記" "再-見理想" "蔓珠莎華"到今日既<樹盟>,仲有下月的"野玫瑰之戀", 再一次期待。

未去睇<樹盟>之前完全唔知道講咩既, 一心諗住去支持一下陳建豪

因為佢係"渴采"既表現,所以亦有所期待的。唔知係咪日場既關係,入到現發現觀眾不是太多,心諗這樣的環境下,表演者心情如何呢?會否有所失落?

坐低後,細閱場刊(我每次都會認真睇曬成本場刊),會介紹套劇,主角及幕後工作人員,亦會介紹日後既劇, 佢地咁用心制作既場刊,唔睇咪浪費囉。

入場不久,燈光消失,魯文傑出來喇,叫我地細心聆聽一段廣播,原本呢幾場係慈善音樂劇。

原來套劇係紅樓夢既第一部曲,講關於年青人既愛情,古代情節加上現代服飾及詞句,以歌曲加上對白令觀眾一齊進入於內。我對中國歷史一點興趣與記億都無,但主角帶動我入戲,有兩幕令我感動,仲眼濕濕添

見 到一對年青情人,經過一年的相思,命運令佢地重遇,但又為免令男主角安危,女主角處處避開男主角,雖然最後都有相認,但一對兩情相悅既人受時世既影響白白 浪費咗一年,不過好彩最後都被男主角感動。但一齊既時間實在太少,但與現代人並不相似,依家仲有幾多人可以為愛既人放棄一, 另一幕就係最後為愛而死,雖然結局並非happy ending但為對方付出一齊,時間需短但珍貴。

之後我地等幾位主角出來,當然我地既目標係Angus喇,咁話曬我地都係來捧佢場架嗎,今次最開心既係有機會同佢影相,仲傾咗幾句計添,佢地幾個又唔出聲,話怕醜喎,有咩所謂呀, 咪當同個朋友傾吓計,鼓勵吓,可以好輕鬆既

就係我同Angus既合照喇,好開心呀...

期待下次"野玫瑰之戀"既出色表現

邊部相機好呢?

之前提過7月去長隆既時候發現跟咗我幾年部相機壞咗, 心諗又未去旅行所以唔買住, 因為我平時好少攞住部相機出街,不過都有睇吓邊部好, 心大心細,又想買啲大機, 又想買返自動既細機, 大機可以影得好遠, 細機就方便, 我最想買到部去睇演唱會時坐$200飛既位, 影到坐$480既相, 咁就最Good, 大家幫吓眼睇吓邊部好

1. Panasonic TZ-15(10倍zoom), 910萬像,3吋 screen,上次去睇飛輪海時, 前面有個fans佢用TZ-3,同呢部差唔多,都影到坐貴飛位既效果

2.Panasonic FZ-18(18倍zoom), 810萬像,, 2.5吋 screen, 呢部仲勁, 佢都算係半專業既相機, 可手動較光圈,又可全自動架, 我諗佢有曬上面部TZ-15既功能再加手動囉, 價錢就比佢貴$700, 體型當然大D喇

3. Sony DSC-H10 - 呢部係頭先上網時睇到既, 佢都有10倍zoom, 810萬像, 3吋 screen,不過Sony未聽過有人話影得靚呀

仲有其餘四部揀既

4.Canon SX-100 800萬像,10倍zoom, 2.5吋 screen

5.Olympus SP-570UZ  1000萬像,20倍zoom, 2.7吋 screen

6.Panasonic FZ-28  1000萬像,18倍zoom, 2.7吋 screen, 佢應該同FZ-18差唔多

7.Canon S5is8  800萬像,12倍zoom, 2.5吋 screen

選擇實在太多,所以自己揀唔到, 幫幫眼喇

9.29 黑氣

 尋日邦邦既咀好似中毒咁腫咗及黑黑地, 佢漏夜去屯門醫院睇醫生, 因為佢有發燒醫生建議佢留醫, 一留就留到依家都仲未出得院, 但又唔知咩事, 睇曬外科, 皮膚科, 連口腔科都睇埋, 都仲要等化驗報告出咗先知咩事

奇怪既事又出現喇, 係29號朝早媽媽明明同我講扮病請一日假, 順便睇吓佢個仔, 點知佢真係要醫院留咗一晚, 攪到我地幾個探完邦邦又要去探媽媽, 媽媽呢次係心口痛,好彩最後醫生話媽媽既報告都無事, 可能出院喇

都唔知係咪佢地傳咗啲黑氣俾我, 攪到我30號個日成日流鼻水, 我以為我既鼻敏感又發作, 但又同平時唔同喎, 成晚都瞓唔到係咁流, 咁1號咪去睇醫生囉, 原來我發燒同感冒, 攪到我成個人都好辛苦及攰, 呢日假期就係用咗來係屋企瞓覺, 呢個病到今日都仲未好曬, 攪到我坐巴士時都俾人嫌棄我呀...

9.27 飛輪海

今晚係期待已久既日子, 就係去睇飛輪海演唱會, 今次係細佬用K分加錢換飛, 一早就上網CHECK左點去,同埋問吓朋友仔既經驗, 咁我同姐姐就決定去機場先食嘢, 我地去到機場原來都係食FOOD COURT, 之後我地坐一個站機鐵去博覽館。

一落車就已經到咗會場, 嘩....好多人送花牌俾佢地架, 成個場館都好香, 揾吓自己係邊度入場先, 我地係坐Ground Floor既位, 入到場後睇到全部爆滿,佢地既吸引力真係無人能及, 坐低後大會送咗張佢地幫迪迪尼拍廣告既Poster, 當然要攞返屋企喇

場館既燈一息,全場人尖叫同企曬起身, 咁我地當然都有份喇, 唔知係咪全場既歌迷都好投入,無人坐底架, 總知佢地一出場就大家一齊企到佢地走, 雖然好攰,但氣氛超正, 佢地又好細心將歌詞全部係兩旁既電視播出來, 就算唔係好熟佢地D歌既人都可以跟住唱。呢個演唱會, 暫時係我覺得最好睇既一個

不過都有少少遺憾, 就係我部相機壞咗,所以無得影相,但我地忍唔住用電話影咗幾張

9.22 飯局

今晚約咗"KYC"既同學仔出來飯局,大家都差唔多成年無約齊人出來食餐飯喇, 今晚約咗係大埔既"阿B飯堂", 明明約7:30但要等到8點幾先齊人, 有人要去睇醫生遲咗,好彩大少食咗飯飯先出來,唔係就肯定餓親佢喇。

有位叔叔一來到就嚇親大少,佢仲想

添, 經過上次同佢地兩個飲茶後,都知知地架喇, 佢要一段時間warm up吓先得既

大少唔好食咁多嘢喇, 唔係到時同我呢個姨姨一group就唔好喇

9.20 再見理想

近排好似去多咗睇舞台劇, 今晚又去睇由張繼聰, 關智斌既"再見理想", 呢套劇全部用beyond既歌串連成一套講幾個年青人既理想。我地幾隻鐵腳都異口同聲話"渴彩"好睇D, 但又覺得張繼聰唱LIVE好得。

之後我地幾個去咗唱K, 仲唱天光添呀, 好耐都未試過喇, 第二日瞓到黃昏5點幾

其實我地都唔係唱K既, 係去聽吓D新歌....