10.21 預祝大少生日

今日約咗朋友去食Tea buffet,原因係大少臭B係下星期二生日,所以今日我地一班姨姨就出來食吓飯,叫做同一然大少預祝生日,佢今日都打扮得好型仔,但佢實在太攪笑,又將 D嘢成日掉曬落地,依家呢個年紀應該係幾好玩同開心架喇, 佢亞爸同亞媽真係要慢慢enjoy吓。

咁一然生日會,點都要帶D禮物去既,之前已經有睇架喇,但買嘢俾咁細既小朋友,真係有D傷腦筋,又想俾佢有得玩,又 想有D嘢學吓, 睇咗好耐,睇中咗幾款,原本都決定買一張枱仔,上面有好多嘢學嗰D, 佢亞媽又叫我唔好買咁貴,咁佢又啱既,小朋友玩幾嘢就可能唔再鍾意玩, 所以又改咗,budget就差不多,不過就買多幾款,等佢一樣玩厭咗都仲有其他。

祝一然 身體健康,快高長大,仲要聽話。

10.19 久利生回來

今日重陽節多咗一日假,屋企唔洗登山,亦唔會安排係呢D日子去探舅公,實在太多人,的士根本去唔到門口,所以尋日就安排咗今早去睇戲。

尋日有兩套新戲同時上映,打算睇其中一套,咁父母想去睇色戒,所以我就睇久利生喇,片長差唔多,唔洗等咁耐丫嗎,呢 套電視劇多年前都有追開,所以知佢有電影版都想去睇,咁啱有假,姐姐又話想睇,所以就決定去睇早場(平D),爸爸仲有長者優惠添,因為有月票,所以我地就 同平時返工一樣咁早起身,一齊去荃灣睇戲,套戲都幾好睇架,不過爸爸就話悶悶地,開頭仲瞓咗陣添,真攪笑,有個朋友都鍾意去戲院瞓覺架,佢地真係夾喇。

之後就去咗飲茶,原本諗住之後去屯門行街既,點知最後都係返咗屋企休息,咁坐吓坐吓就一日喇,放假既時間過得真係快。

10.13 澳門遊

今日係公司一年一度既旅行,依家公司人太少喇, 所以咩都係我安排,往年都只係安排香港一日遊, 前兩年已經去咗迪迪尼同海洋仔喇,所以今年就更加無地方去,所以最後就安排...過大海。

之前仲安排曬景點,但只係去咗近期大熱既威尼斯,食完Lunch都已經3點,所以係附近行咗一陣, 就散喇。其實都無去過咩地方,但唔知點解攰死咗,連Dinner都無食就返香港喇, 真浪費...張船飛。

可能太攰+心情很差,所以就瞓到星期日黃昏6點幾先醒(足足19個鐘),差少少連要去睇千嬅都唔記得,好彩都趕得切,只係同唔到朋友食飯,要朋友仔幫手買嘢份去食,不過今次千嬅既演唱會幾好,唱歌好咗(一直都鍾意既,有買正版),D衫好過上次,整體都好過上一次既。

10.12 手信

今日約咗心仔既同學仔去食飯,因為有人由台灣回來,佢呢個行程又要同天氣打過,回來又要同病魔作對,有D辛苦吓,要保重喇。不過都要特別銘謝,因為有手信。

今日剛知道有朋友份新工無做, 可能太辛苦喇, 咁我地就大家都講既好多,包括將來,個人方向,讀書,計劃...太多喇, 不能盡錄,有幾個話題,大家都講咗好多個人睇發,仲有少少激烈添, 不過我諗大家講到咁激,都係想對方好既。 

致  各方好友

對於我, 呢個人比較直接同快, 如果有咩得罪,請多多包涵

出發點都係好既。

10.4 媽媽生日

每年6月至10月起, 屋企人就開始輪住生日,每個月一個,生日例必大食一餐, 媽媽係最後一個, 原本佢係想食和牛(成日都想), 但問佢去邊度食又唔知(之前睇中咗架喇), 咁又話去食自助餐,不過最後都係返屋企食大閘蟹,所以安排咗弟弟去買, 佢總共買咗12隻蟹, 1斤虎蝦同5件牛排, 由於蟹已經好多, 所以D牛排都無食曬。

咁我諗住佢夜D收工(都只係7:30), 咁我就去佢公司攞住部份返屋企先, 我已經事前同佢講咗咁多嘢會好重,一人攞D,點知佢居然全部入曬一袋俾我...嘩...好重呀, 有成11磅幾架, 佢實在太可惡喇, 所以我有所決定, 就係俾少D錢佢

10.1 落田

之前都有同大家提過去揀田, 今日朝早就有個說明會,教吓大家點種,用具係邊喇,點用喇, 最重要係派種子同肥料。

尋晚較好鬧鐘, 早D起身,食完早餐,就同爸爸一齊落去聽, 我地就揀咗波菜,蕃茄,菜仔同埋自備既蕃薯,我覺得好得意同好好玩, 遲D仲要去睇吓可以再D咩嘢種...真期待收成。

9.30 萬人空巷

今日實在係太早太早要起身(5:30),所以前一晚瞓得唔係幾好,我怕起唔到身,因為今日要去既活動,集合時間係7點,仲要去一個唔識既地方"馬鞍山",所以就要咁早喇。

我係同姐姐,Iris,Olivia係同一組,都係同一個地方集合,但去到只係得我地幾條友仔, 人影都無,後來姐姐就call個Official,佢話佢坐錯車,去錯地方,搭緊的士來,叫我地等一陣,好快到。

今日既活動係慶祝香港回歸十週年最後一擊"萬人大極",呢個活動係舊機場做既,平時無咩機會入去架,所以有份參與都幾開心

我既工作範圍:點名,check吓嘢,帶人去目的地,派吓嘢, 提點吓表現者,帶人走。少少似領隊咁,幾得意,之前未試過帶住D人咁,幾好既經驗。

雖然今日熱咗D同曬咗D, 不過我真係覺得好壯觀,因為可以係現場咁近睇到2萬幾人同時耍太極。

仲有, 今日臭B去影沙龍,原本諗住影完過來同我再影過架,我make咗appointment架喇,但老細影咗一日見攰,所以最後都係唔成功呀, 好明顯唔妥我呀,但...無計仔,只好再等吓次喇。

9.29 揀地

今日開始我既三日假期,但10點未夠就起身喇, 由於爸爸要出去表哥度幫手, 要同爸爸一齊早出門口,但我地又要去揀"地"呀...所以我同爸爸就去揀"地"先,佢再出去囉。

我所講既"地",就係屋企樓下有咩親子綠園,咁我地就去咗抽籤,而且"中"咗添,咁今日下晝3點有得優先揀,但爸爸應該未返到屋企,所以就我去辦手續,所以咪要去揀定先囉,好開心架,有得玩,需要今期時間短D得半年,但都好丫,可以種自己想種既農作物,應該好好玩。

之後我就去咗銀行攪D嘢,我原本想同爸爸一齊食埋早餐既,但佢要出去就無計喇, 所以我就自己一條友仔去咗麥仔,照舊食"早晨全餐",食完之後就買咗報紙,雜誌同牛奶就返咗屋企,由於早餐食得太勁,所以我Lunch就唔食,叫做幫補吓囉。

9.27 說明會

大概兩個月前朋友問來緊既星期日得唔得閒,咁我見條件幾好,又咁多朋友一齊去,咁我就當然唔少得我喇,所以今晚一放工 就要走人,仲要急步添,因為要趕注6:30去到沙田運動場,又唔識路喎,所以就約咗沙田人Olivia,Iris同姐姐一齊過去,已經諗住坐的士去既,如 果無車,都有沙田友帶路,其實都唔近架,雖然我地坐的士,但由於的士司機唔係幾鍾意,扮曬唔識路,所以我地就早咗落車,點都係要行先到丫,仲你中途見到朋 友既媽媽同姐姐添, 不過司機真係要檢討一下喇。

去到後都要等...到差不多7點先開始講解,好快就8點半,講解咗D,分咗D資料同物資,要自己孰讀同到時帶去就OK, 完咗之後,我就同Iris,wps同姐姐去咗沙田食飯,今晚食到好飽。

9.25 中秋節

一年容易又中秋, 舊年食咗好多月餅,但今年就...為咗減肥,所以決定唔食月餅,少咗D氣氛咁囉

之前已經有好多人問我有咩攪作,但無人有提議

最後都係照舊去BBQ,由於太遲先決定,所以好多想去既地方都滿曬,唯有去遠D喇...大尾督,好多間都有位添,咁就諗住做完節就出發。

今晚有好多人來咗我屋企一齊做節,但由於媽媽多手,放咗D冰糖落D湯到, 差D又攪到爸爸發脾氣,做節D餸就當然會好D喇, 不過今次真係勁,因為次次做節D餸都食唔曬,但今次就無咩食剩(唔洗第日再食),太好喇

做完節後,細佬朋友CALL佢話屋企附近個BBQ場WALK-IN有位,叫我地即刻過去, 咁我,弟弟,同埋靚女即走,不過我地就要呆坐1個多鐘D人先開到。由於食完飯先去,所以都無咩點食,有少少唔抵,不過都係一大班人坐吓傾吓又一晚