11.26 大傷風

上星期四上完大陸都已經唔係好舒服架喇, 喉嚨唔係幾舒服,咁我以為因為食咗太多辣嘢, 而且公司有個衰人呢個星期係咁係度傳播細菌, 星期六去買餸嗰陣已經去睇咗中醫, 尋日去大圍睇樓既時候辛苦到要再買西藥食, 係屋企攞定既盒裝紙巾已經用咗半盒, 成個人都好攰,瞓之前再食多次西藥, 今日起身都唔掂,成個人周身骨痛, 頭又痛喎,又流鼻水, 又咳, 所以決定今日請一日病假, 我已經好耐無請過病假喇,請假太麻煩喇,第日返到公司咩事都等緊妳做咁, 所以無咩必要都唔請, 但今日起身太辛苦喇, 點都要休息一日先得, 咩都聽日先算喇。

11.24 恭喜恭喜

今日係屋企既大日子, 係爸爸同媽媽結婚35週年, 我地要一家人一齊慶祝, 諗咗成個星期話今日去邊度邊度慶祝, 不過最後都係係屋企一家人一齊打邊爐, 當然食既嘢都係大家鍾意食既, 有好多海鮮同和牛...等等

我地仲分工合作添, 我同姐姐去買餸, 返到屋企就係我洗同整吓, 細佬買海鮮同和牛, 莉莉就洗碗, 咁又一日喇。

11.18 海下之旅

今日約朋幾個朋友同姐姐一齊去行山, 今次係夏天之後再次行山, 目的地係西貢海下, 呢個地方好多人都話好靚架, 所以好期待同開心。以下upload幾張靚相同大家分享吓喇。

紅樹林來架

 

高處而下既海岸

 

貼近既海邊

 

呢張相俾我特登影俾大家睇吓架, 香港都有紅葉架

 

以下呢張, 亦都係影俾大家睇吓, 原本香港有好多地方都可以好靚, 但就係有好多人唔識得珍惜, 將好多垃圾隨便咁掉落海, 所以呢D垃圾再次由海上回到我們既地方, 請大家珍惜現有既好地方,唔好再係咁喇。

 

好快咁就行完喇, 今次係姐姐第一次同我地去行山, 所以我就準備咗好多嘢食, 後來我地係一個露營既營地度休息咗一陣, 攞咗D嘢食出來食, 坐咗一陣就繼續餘下既路程。成個行程我地行咗4個鐘, 之後大家就去咗西貢市食個下午茶, 食完之後出到門口發現到有間麵包店排曬長龍, 原係呢間舖好出名架喎, 當然我都唔執輸喇, 買咗3個菠蘿包, 同姐姐share1個, 其餘既就攞返屋企俾爸爸媽媽試吓, 咁都幾好食既, 只係貴咗少少囉, 成$5一個架。

要多謝朋友仔帶我地去呢度行山。

11.13 姐妹裙

朋友既婚禮仲有1個月唔夠就到喇, 但總未買到要著既衫,有D緊張, 今晚再次約咗朋友一齊去旺角睇衫, 佢就已經買到衫喇, 咩都攪掂曬喇,但我就咩都未得, 原先一早諗住唔買D咁貴既, 都唔知仲可唔可以再著, 做姐妹既衫都會勁D,平時點著丫, 睇中咗2年衫, 一件就細咗少少, 一件直情唔試得, 成$600一件都唔試得,都唔知有無攪錯, 後來再行另一間shop, 呢度D衫明顯係專做姐妹裙, 睇吓睇吓都OK喇, 又不會太勁, 咁試咗2條,其中一條都幾OK, 普普通通但都幾隆重咁, 雖然價錢貴咗少少, 不過最後都決定做呢度做一條裙, 仲要10日就起貨, 等我攞埋條裙就可以睇埋鞋, 依家起碼攪掂一樣, 無咁擔心喇, 希望條裙仔會好靚喇。

7.1 自身的十年回憶

十周年回歸,令我想記錄自己過去既十年既點滴, 離開學校, 投入工作接觸社會,

剛出來做嘢,大部份都係律師樓工作, 呢幾年轉過好多份工,好似份份都做唔長咁,成日轉,剛入行時市道好好,人工都唔錯既, 所以就同兩個朋友同姐姐一齊搬咗出去住, 當然好景不常喇,一年後就遇到第一次俾人炒,公司要減少人手,所以就先對秘書仔落手,當然包括我喇, 但好快就揾到一份新工喇, 做咗2個月左右,又再次俾人炒, 可能我真係唔啱做呢行喇, 之後成3個月都揾唔到嘢做, 就搬咗返屋企住喇, 咁我覺得連續兩次俾人炒, 咁係呢個時候就決定要轉行,咁啱有份深水埗既批發行請我做跟單, 所以就決定做跟單喇, 但一年都唔夠,呢間公司就執咗, 咁橋第一次炒我間公司請人,同事就叫我返去做, 咁無嘢做咪返去囉, 但半年後都無做喇, 因為車費太貴,人工又係好高, 而且呢行對於我無咩學歷既人來講,應該做唔長,所以再次揾D跟單, 無耐就係荃灣揾到份文具跟單, 呢度既同事同環境都唔得, 大家同事一句閒計都唔講架,係全部人都唔講,唔單單唔同我傾計, 食晏都係分開曬,唔會一齊食既, 真係頂唔住,所以又無做喇, 就快到農曆年咁就等過埋年先再揾嘢做,之後就揾到依家呢份工喇。頭幾年都讀咗好多唔同既嘢來充實自己,但做咗呢份工之後,就無讀過D咩喇。

2000~至今 工作於同一間公司, 已經係我工作生涯裡暫時做我最耐,我自己都覺好勁, 雖然比好多人來講只係好短。在這裡經歷咗好多, 唔知係咪做得耐都會係咁既呢? 呢度係外國人公司, 接觸到好多外國人, 係呢度學咗好多以前唔識既嘢, 頭三年係香港office, 學識點樣做跟單, 之後上咗大陸三年, 呢三年真係學咗好多嘢, 講國語/做繁複既報告/人事管理/做事條理/認錯....真係好多, 呢幾年令我變得成熟, 依家又調返返香港, 仲要做一門自己唔識既嘢.....會計, 仲要同總公司聯絡, 文化上既差異, 對於我來講已經唔係問題, 係度做咗咁耐咩都知道,所以暫時都OK既, 遲D就真係唔知喇, 咁都幾好丫, 又有機會學吓D新嘢, 好過成日做相同既事。

由出來工作至今, 識到好多同事, 變成朋友, 共同渡過順景及逆景, 但總括來說一切都好好同好平坦, 好鍾意呢D平淡既日子, 希望將來大家都會一樣開心快樂及順利。

11.11 睇樓

今日弟婦媽媽會來我地屋企探我地, 咁弟弟同老婆就要負責去揾位飲茶, 今早媽媽係屋企睇"睇樓皇"發現咗有一個新既村屋今日開放日, 咁我地就一家人飲完茶去睇樓, 媽媽成日都想搬間大D既屋, 我都想, 但都要供得起先得架。去到個地盤時都見到差唔多起好, 但居然無地產理我地, 可以見到我地成班窮鬼, 依家只得7座,好快就睇曬, 得第1座好少少, 但要成$400幾萬, 個發展商都唔知係咪傻既, 又唔近市中心,用料又唔係超好, 咁都開呢個價, 買既就真係傻喇, 後來再去睇第二度, 呢個盤就比第一個近市中心少少,但又係咩都未攪掂, 滿意紙都未有, 間隔麻麻, 窗又細, 但都唔平架,要成$300幾萬。一般打工既點供呀......個樓市痴咗。

11.11 睇樓

今日弟婦媽媽會來我地屋企探我地, 咁弟弟同老婆就要負責去揾位飲茶, 今早媽媽係屋企睇"睇樓皇"發現咗有一個新既村屋今日開放日, 咁我地就一家人飲完茶去睇樓, 媽媽成日都想搬間大D既屋, 我都想, 但都要供得起先得架。去到個地盤時都見到差唔多起好, 但居然無地產理我地, 可以見到我地成班窮鬼, 依家只得7座,好快就睇曬, 得第1座好少少, 但要成$400幾萬, 個發展商都唔知係咪傻既, 又唔近市中心,用料又唔係超好, 咁都開呢個價, 買既就真係傻喇, 後來再去睇第二度, 呢個盤就比第一個近市中心少少,但又係咩都未攪掂, 滿意紙都未有, 間隔麻麻, 窗又細, 但都唔平架,要成$300幾萬。一般打工既點供呀......個樓市痴咗。

11.10 新形象

回望過去一星期,好多日都去街,成個人都好攰,剩係去行街都行咗2,3日,要去睇姐妹裙,睇咗咁多都仲未攪掂,朋友仔就已經攪掂曬喇,好快就到架喇,都唔知點算好???

今日約咗朋友同姐姐一同去攪攪新形象......電髮, 今次去咗朋友介紹既髮型屋度整,價錢OK,服務都唔錯,咁今次就俾曬個髮型司攪,我剩係問咗佢一個問題,就係電完會唔會老D,佢就答我唔會架喇,咁我就唔 再理佢點整, 咁整呀整呀,出來個效果D朋友都話幾靚,咁其實我都覺得幾靚,但就好似唔係好襯我平時個LOOK喇。

11.6 累

下個月頭朋友仔就結婚喇,但我地班姐妹仲未買到衫,所以今晚就約咗 朋友一齊去銅鑼灣行街睇吓有無得著,我地仲攪其食D嘢就行喇, 要把握時間, 我地行咗好多地方,都發現無咩金色系列既衫,有既都係一D好formal既飲衫,或者未能符合我們既標準(平,靚,正),所以最後都無收穫。在我預備返屋 企既時候,有朋友CALL我話出來飲嘢(有事發生咗,要傾吓),所以後來又改去旺角,我地傾吓飲吓,時候真係飛逝,咁就2點幾喇, 為避免左住人地收工,我地都鬆人,好彩姐姐係度,唔係我都唔知坐咩車好,原本都諗住BY BUS既,但最後都同朋友結伴去坐小巴, 呢個真係奇景呀, 由旺角上車去美孚, 只需3分鐘, 無錯,無寫錯同睇錯, 真係用咗3分鐘,剛開車時我唔知上咗車神架車, 無做好準備, 差少少就轆咗出來,怪不得平時個FRIEND係我都未上到車,佢就已經返到屋企,有時仲要沖埋涼添喇,真係要小心呀。

我差唔多4點先返到屋企,攪吓攪吓4點半先瞓, 第日仲要7點未夠就要起身,真辛苦呀, 下次都係放假前夕先去到咁夜會好好多。

11.5 日本菜

死喇, 今晚又去咗食BUFFET, 10月既時候有朋友生日想去食日式自助餐,咁我地就去咗沙田某酒店度食,但惡評如潮,咁我同另一個朋友提及老尖有間好平既,但就未誕過,咁就廢事同朋友慶 祝時去食喇, 咁朋友就提議之後大家一齊去試吓,咁最終就今晚一齊去咗試食喇, 埋單每位$152,有多款式食物,味道就有某D幾好,魚生,燒物都幾好,壽司就麻麻喇,但整體都唔錯,呢個價錢值一食,但唔知係唔係每碟既份量都唔多,食 吓食吓就食咗好多, 到我返到屋企沖完涼,直情想吐....

11.4 家庭樂

由於上星期入咗CAMP,所以無陪到屋企人去飲茶。之前朋友亞仔 生日我地去咗食TEA BUFFET覺得幾好(又多款,又好食同幾抵),所以就諗住同屋企人去食吓,爸爸又鐘意食西式嘢,媽媽又鍾意食魚生, 咁食BUFFET就咩都有齊, 原本都諗住食TEA,但最後都係食LUNCH,因為多D嘢食,咁折咗都唔洗$200,都OK喇, 咁諗住出到老尖,食到咁飽就去行一陣先返屋企, 咁就好開心又過一日。

唔記得同大家分享吓添, 就係係出發食LUNCH前,我同爸爸去咗我地塊小農地,今日係收成既日子,同爸爸一齊收成同整理一下塊地,中間仲見到隔離農地個嬸嬸添,我地同佢傾吓種菜既心得,好快咁就一個鐘,不過玩得好開心。塊地依家有少少空位, 新一輪種咩好呢???

11.3 聚會

仲有一個月,就係一個我認識咗7年既朋友大日子,今日佢約咗一大班兄弟姐妹一齊見面,傾吓有咩安排同埋諗吓有咩預備工作,之後我地班姐妹仲去咗飲嘢,要傾吓點樣對付班兄弟添....

但最令我頭痛既係,到依家仲未買到衫呀....點算好??又要買衫,又要諗吓化個咩妝,整個咩頭,連去邊度瞓都要安 排一下, 因為朋友仔住西貢,嗰日要8點半就去到, 由我屋企剩係坐車都成1個半鐘,仲要預埋我換衫同執吓個樣, 咁我咪要成5點鐘就要起身,真係要盤算一下去邊度瞓先得,終於俾我諗到喇, 就係去將軍澳朋友既屋企借宿一宵喇,咁我就唔洗咁早起身喇, 太好喇,我仲問咗佢添, 真係夠朋友喇.....哈哈哈。

但最嚴峻既工程尚未完成呀....

10.28 營後感

今日出CAMP,好快就玩咗兩日喇,大家都好攰,今日有個活動係繩 網架,其實我想玩呢類型既嘢好耐架喇, 原本都好想玩,但真係實在太驚,又高,又無嘢扶,所以最後都只係係下面睇住大家玩,之後仲玩咗個障礙賽,就係呢個GAME俾咗一個唔好既感覺俾我,雖然我 係呢個GAME受咗少少傷,但唔緊要既,但唔好既感覺並不是呢件事。就連場地指導員都講到出口,但唔知其他人有無同感呢??唔知點解真係一D團體精神都 無,好散,最後一個關大家都無咩力再沖,但已過關既部份組員直情走埋,咁樣又點會唔輸丫,其實輸贏都唔係問題,但呢件事令我覺得有D嘢真係講得幾啱。

好似一部車有4個車輪, 如果只有一個轉得好快,但其他跟本跟唔上, 架車都無可能行得好快,唔係因為其餘3個車輪既影響,當你叻/快既時候,咪教吓其他/幫忙其他既車輪,咁先可以一同前進架嗎?我諗大家都明白呢個道理,只係是否做到?

仲有一個幾好既信息, 就係晚會俾我既。

1. 提及萬物皆有生命,同等的

2. 珍惜現在擁有的

3. 對父母或者親人要愛護

對我最深刻的就係尾段有好多相片對比,當見到一些同自己有密切關係既事情時,自己再諗吓,可能我都做緊一D唔應該做既事,又或者係唔係好似旁白咁,到自己既時候真係做唔到呢?我希望我真係可以做得到調返轉頭,唔想變成旁白咁樣。

10.27 好友營

去年的參與令我期待今年的來臨, 終於到咗一年一度既好友營, 心情好好, 今年仲帶多兩個朋友一齊去玩添,我以期待既心情入營,可以係第二次入camp,所以今年既準備好少少, 等我同大家分享一下喇。

今年個camp係大埔林村愛丁堡,camp既設備幾好架,仲有好多新朋友添,去到就分咗宿舍先,之後就去操場分組,開始兩日既旅程。

今年玩咗好多細佬仔時好鍾意玩既遊戲,大家都玩得好開心。帶我去既朋友仔係今年既攪手,佢成日都問我覺得點, 整體今年都攪得幾好,大家都好開心同投入既,明年繼續努力喇,仲要多謝其他既攪手呀。

如果有朋友都想一齊玩得咁開心,下年就一齊來喇。