9.16~23 一週回顧

諗咗一陣睇吓點寫好,在過去一個星期都無咩特別事發生,但又想update一下,最後就決定一次過寫曬所以想寫既嘢。

 9-16

原本今日係同心記既同學仔一齊去義賣月餅,所以一早就較咗鬧鐘早D起身,同屋企人食完嘢就出發,差唔多夠鐘出發之一刻,收到攪手既電話,話月餅已經賣曬,所以唔洗去幫手喇,最後就同屋企人係附近行吓,就返咗屋企喇,好無聊咁就一日喇。

9-20

去咗學set頭,之前都有提過,要幫朋友做伴娘,咁當然佢D姐妹都係我D朋友喇,所以我就同其中一個朋友一齊報咗個堂course學set頭,都係一D簡 單嘢,不過都OK既,學到少少嘢,幾好玩,好快就上咗2個鐘,不過可能仲要睇吓有無其他差唔多既,再學吓先得。

9-22

屋企一直都養魚魚,仲有D係就好細好細條,養到好大,但最後都難逃一劫...死咗。我諗最後一條可能係唔開心,佢眼見其他魚魚一條一條咁離開佢,所以佢最 後都唔想繼續留係度,咁呢個魚魚籠屋,就變成咗魚魚豪宅,為咗唔想剩低嗰兩條細魚魚咁悶,今日就約咗爸爸媽媽一齊去魚魚街入番D新住客,我地一早就決定今 次唔再買金魚(要成日換水同易死),所以決定買紅劍(易養D),咁我地行曬成條街,最後買咗5條紅劍,5條鴻運當頭(金魚仔)同5條燕尾,全部都係細魚 魚,雖然咁多條,但都唔算好迫呀,都仲係小豪宅,仲同佢地換咗個新濾水,等佢地生活環境好D,唔洗成日換水,咁佢地應該會習慣D,D魚魚仲好活躍添,成日 都游來游去。

9-23

揾到個藉口,所以偷懶一個星期無去做運動,今日再去做,都唔係太辛苦,都係跳咗一堂,要再努力呀...

不過今個星期,一直都有D嘢令到我唔係幾開心,但又唔知點講好...

10.10 預祝

又再朋友生日, 一到下半年,差唔多每個月都有朋友生日, 今日約咗幾位好姐妹去食日本放題, 原本打算去中環食既,但有位靚女比較忙會晏D先到,所以就去近少少,等佢唔洗咁夜先到,但點知最後...佢可以準時到達餐廳。

今晚朋友請大家睇佢最新既相,嘩嘩嘩...大家都笑

,因為有少少.....唔講得咁白喇, 明既就會明架喇。

不過最想講既係呢間餐廳, 我就絕對唔會去第二次架喇, 因為我地叫來叫去都係嗰幾樣,又唔係咁好食,又唔平,真失策。介紹錯咗,

Sorry...

9.15 尾班車

今日好充實呀,做咗好多嘢。

約咗弟弟去沙田跳健康舞,之後就去上水睇醫生。夜晚去咗朋友屋企,原本係BBQ,但天氣實在唔容許喇,恐怕會熱死人,咁我地就食吓食吓,睇吓睇吓, 傾吓傾吓, 咁就已經半夜2點幾,要走人喇, 我未試過咁夜,更係要問吓朋友邊度有車搭喇, 朋友教咗我地之後就走人喇

我同姐姐先帶咗朋友去車站,等佢上埋車先走,咁我地就行去朋友話既車站等喇,但行到過去, 依...無車既有D擔心添,咁我地就睇吓附近既車係唔係去我既目的地喇,無既?

等咗一陣有架車出現喇, 終於見到我想搭既車喇,好開心喇, 唔洗搭的士丫,上到車司機大佬同我講,呢班係最後一班車呀...真好彩

9.14 受氣了

終於都等到星期五喇, 返埋今日就放兩日假,本應好開心既但今日接二連三咁受氣了有D唔開心。其實都係一D好少既事,可能心情唔好喇,所以就特別唔開心囉。全部都係公司發生既, 我係度諗,點解要受D咁既氣呢?? 都唔知係唔係我做錯咗。

我都係想公平D姐,咁都唔得

我點做野係我既事,應該唔關其他人既事丫

要人做嘢,點解連最基本既禮貌都唔識?小朋友都識得講"唔該"喇,點解唔學吓呢? 好嬲丫...

9.11 捐款箱?

今日係公司實在太得閒, 攪到我嗰人超悶,上網都上到厭唉...咁樣落去真係唔係辦法.

終於都等到放工, 依家我計劃逢星期二,四,六或日都去跳健康舞,所以今日約咗尖尖一齊去,有人今日要去睇古X基所 以休息一日,好早就去到沙田,所以係附近既shop行吓,睇吓有無嗰D放係收銀機隔離既捐款箱,因為我有D錢唔可以帶返屋企,但又用唔到,所以就打算用呢 個辦法處理咗佢, 但都揾唔到, 咁就諗住做完運動先行遠少少去揾, 上到去等開班, MISS都跳得好慢,但又出到好多汗架(上次第一次跟呢個MISS既時候已經發現), 跳完之後我就同尖尖講要做少少野, 佢就提議我去麥仔,嘩...終於都揾到喇,可以放心,因為如果真係揾唔到,我唯有將佢投入"垃圾桶"內。

9.10 失望

今日約咗幾個好耐無見既朋友一齊去旺角唱K及傾吓計,但...原本計埋我有5個人既, 咁朝早再Firm其他人喇, 有1個就話上星期成個星期出咗街嘢,所以好攰要好好休息吓先得,咁就少咗1個喇 咁都諗住有4個人都OK喇,到夜晚6點幾既時候,另外1個又話佢突然知道男朋友第日要飛,所以要陪吓佢,所以又少1個其實我都已經去到旺角行緊街等其餘2個人,但我又諗有個Friend放工都已經7點幾, 出到來都8點幾喇,咁我咪同佢講不如唔好出來喇,今次唯有取消先喇等下次人齊先再出來,但後來我先諗到我幫佢買咗嘢,都唔知點俾佢添呀煩死人喇, 之後就同Kennis2個去附近既Cafe食嘢,D味道都OK架(食齋既嘢),可以再去食完行咗一陣就走人喇。

P.S. 各方好友, 尋晚收到Kennis既通知10月底既Camp已經出海報喇,要參與既朋友請盡快通知我呀

少少資料:10/27-28, 有好多集體遊戲玩(一定要參與), 2日食齋,$200,同埋要預備一首代表自己或者自己鍾意既 歌。

9.9 運動日

星期日...通常我都會留係屋企休息吓,不過今日就約咗2條友仔去沙田跳健康舞,打算跳12點同1點2堂,咁我咪教鬧鍾10點起身,都提早2個鍾架喇,應該夠時間,但我係屋企食吓早餐喇,同爸爸傾吓計,好快就差唔多11點囉,咁我又遲咗少少出門口,唉...咁就慘喇,趕唔到11點鍾既巴士,仲要熱住咁係巴士站等咗15分鍾車添呀,去到既時候已經入緊人,無人同我登記,攪到我又唔可以去換衫先,白白咁係度等囉,不過好彩唔算full都跳到,第一堂可能我盡力咗少少,到跳第2堂既時候已經有D腳仔軟,不過都有跳曬,之後就同WPS返上水,途中經過化妝品公司,就入咗入買咗個捷毛鉗,因為原本嗰個唔知去咗邊(不過後來已經知道係俾隔離房既小偷攞咗去用,無還)。

9.8 揀衫日

今個星期開始減肥,所以好努力去做運動(星期二,四同日)同食少D野。所以有少少成績。

今日朋友約曬D姐妹一齊去揀衫(幫朋友做伴娘),所以就約咗下晝一齊先去飲茶,之後一齊行去最多結婚野賣既商場... 金都, 朋友之前已經睇過曬架喇, 佢有3個目標,咁我地都每度行咗兩次,最後都決定咗其中一間,呢間係3間之中最多人既一間,不過呢度就貴少少,不過我覺得呢間既款式真係多D同靚D既,我 一入到去就睇到一件粉橙色,好多珠同花巧D,試咗之後我都覺得幾靚,但有人話唔好呀不過佢地話試多幾件睇吓會唔會有D仲好,咁大家都試咗好多同好耐,不過 我最後都係揀咗第一件既款,但係白色既,朋友話白色無咁唔方便同埋好睇D喎,不過就要買對新鞋襯喇。

9.1 免費晚餐

弟弟今日入院做手術,所以都好早起身,因為下晝要帶爸爸媽媽去睇吓細佬。睇見佢做完手術無咩事,都好D,不過佢話真係痛。好快就唔痛架喇

夜晚就同姐姐去咗睇演唱會...即係我講既"免費晚餐",係弟弟俾飛我地架,都好開心,因為有...黎明

好耐無睇過佢既演出喇,除咗佢之外仲有千樺,都係我鍾意架。

真係要多謝弟弟。