01.28 慰勞宴

今晚朋友請食飯, 佢地為咗答謝我地一班兄弟姐妹幫手, 幾勁呀我地有成18個人,一坐低朋友就分派當日既相, 糖同自己揀手信, 我揀咗一份玻璃既擺設,可以放係我新屋度。

嗰日既相都影得幾靚, 但就有少少唔

01.26 可惜

今日下晝約咗尖尖, 首先陪佢過過還神,之後大家一齊落黃大仙都係還神, 原本打算2號先去既, 但媽媽話要還神後先可以食團年飯,所以就早少少。

朝早出門口既時候見凍凍地,所以就著咗我最鍾意著既羽x加風褸,後來見熱熱地就打算換過年褸, 最後就剩係唔著既羽x就算喇, 就係因我一時既快,就做咗個錯誤既決定, 我最鍾意既風褸去到黃大仙唔知幾時俾人燒咗一個小孔, 真係有D唔開心, 但都無計............

依家仲未諗到辦法點樣補番個小孔仔。尖尖嗰日話請我食TEA架, 唔知幾時會補反番俾我呢

08.01.13 兩週回顧

01.13

今日可以收樓裝修喇, 好開心

01.18

聚會, 今日約咗Kennis,Wing食飯,之後就去Wing既新屋參觀吓同睇相, 佢既新屋好靚架, 裝修同設計都好好,無計喇, 鬼叫人地老公做呢行咩, 實靚架。

01.19

前幾日終於訂咗牆紙喇, 今日係自己同日本既shop訂, 又要俾錢先,有D擔心, 不過最後都成功, 總收埋貨添, 總算放心喇,唔係就白白無咗幾千蚊喇。今日下晝去幫朋友做model化妝,唔知係咪我既關係喇, 導師講咗D問題, 夜晚同另外2條友仔去睇"27宜嫁"好好睇同好笑, 之後仲去咗BBQ添, 又攪到好夜。

01.20

晨早俾媽媽嘈醒, 咁就起身開始執嘢喇, 真係唔知點入手, 太多嘢喇!!!好彩姐姐後來幫我執,所以好快就執咗12箱喇, 不過仲有好多, 下星期再努力。

01.21~24

呢幾日好煩,成日都接到個agent既電話, 為咗我地租多3日,日日都煩住曬。仲有呢幾日放咗工都要去攪新屋既事添,好攰呀...我諗仲要最少過多一個星期先攪掂。

08.01.12 姐妹日

今日係朋友既大日子,請咗我地一大班朋友去幫手,大會提供晚裝俾我地著, 好早既時候大家都話盡點力減減佢, 但到今日大家都係一樣呀,我就盡咗少少棉力,就係上星期整個星期都係飲菜湯,雖然都無咩用,但總好過無。

前一日早走幾個鐘,去幫朋友攞衫及攞嘢去酒店,返到屋企仲要攪少少玩新郎既嘢,都攪到夜夜地,第二朝要7點去到酒 店,所以5點幾就起咗身,不過都好彩架喇, 朋友安排咗人幫我地set頭同化妝,所以好快就可以出門口, 我約咗其中一個朋友一齊坐車出去, 佢真係癲咗, 因為佢公司太多嘢做, 前日晚居然開通宵...

整日都好忙咁, 接新娘, 去男家, 教堂同酒樓,今次我既角色係伴娘,係教堂都有行,之前有少少驚, 但到呢日又無嘢, 有朋友叫我唔好笑咁多, 咁我咪收吓囉, 點知佢地覺得我好緊張喎,不過點都好,無驚無險又攪掂。

夜晚見到幾個好耐無見既朋友, 有人話我大個咗,但有衰人即刻反駁老咗就真喇...係邊個心知肚明呀, 有朋友唔認得我, 真係太耐無見喇。

唉...今日著到咁靚, 雖然個妝老咗少少, 我自己有帶相機架,不過無咩點影到, 真係太忙喇,依家唯有等高層部相機D相喇, 但唔知要等幾耐呢

最後, 今日既行程無咩得手嘢呀.

2008.1.10

2007年已經過完, 踏入新既一年, 係咪又好易就過呢?

呢兩個星期都好忙,都唔得閒update, 唯有依家一次過寫曬呢兩星期既事先(學尖尖既)。

07.12.28

幾年前同細佬一齊買咗我地人生最貴既一樣嘢.....樓, 買樓對於我地一家人來講都係一年好開心既事, 以前細佬要瞓廳架, 但買咗樓之後就大家都有自己既房喇,而且仲改善咗我地既生活環境,以前間屋都好好, 周圍仲好舒服添,不過當然新樓仲好喇, 不過依家已經唔夠住喇, 同我熟既朋友都知道原因,所以換樓都係近期既話題,但我地既要求同限制太多,所以都攪咗好耐, 可能大家都鍾意依家住緊間屋喇, 所以一直都係得嗰"講"字, 但好突然間好快,半日內就決定賣同買喇, 今日仲收訂金添,好多都定下來,無得再變喇, 我同媽媽都好唔(寫)得, 但新屋雖然係隔離,但點都算係分開咗架嗎。

07.12.29

朋友係2個星期後結婚,叫我幫佢做伴娘, 由於佢係行教堂既,所以今日要去rehearsal,原本我以為好普通既,但原來好認真係, 全部人都到齊, 即係教堂上有嘢做既人都到齊,除咗賓客今個chairman遲到外。死喇, 到時都唔知我會唔會做錯嘢添,我都未行過教堂,又未去過睇人地既婚禮。

07.12.31

今日係去舊迎新既日子, 點都要出去玩吓架喇, 可能依家大個咗,唔想同人迫, 唯有約三五知己去燒嘢食喇, 已經book咗位架喇, 但去到都仲要等,激死...

08.01.02

老同學/朋友今日生日,我地幾個人去咗呢個瘦猛猛最鍾意既沙田打邊爐, 有人遲到呀...我地幾個人當中,其中兩個今日都有人工架, 仲有人有花紅添呀,真好,唔知我今年成績又如何呢??唔洗寄望架喇, 一定比上年差。

08.01.04

今日落訂喇, 好似好耐咁既, 唔知係咪心急想快收樓呢, 有好多嘢要做, 又仲有1個月都唔夠就新年, 呢個大Project攪到唔知今年點團年, 著咗嘢之後點食飯呢, 其中一間仲死都要成交日先交吉,如果佢都肯早D就好喇, 咁我地就無咁煩架喇。

08.01.05

為咗準備參加朋友既婚禮, 我就好認真咁約咗今日去洗牙, 其實我年年都洗既, 只係今年遲咗少少, 晏晝就同班姐妹一齊去Final Fitting, 都攪咗好耐先攪點, 人已經唔多,但都唔知點解,個個 姐妹年衫都要改完又改先掂。

08.01.06

今日又去燒嘢食, 原本係2個星期前去既,但有朋友唔舒服,所以改期,之前又俾咗$500大元訂金,唔去都唔得呀, 不過呢度係非一般既BBQ場呀, 仲有馬騎架,不過我怕咗佢地,所以放棄咗,不過都有2個朋友玩呀,佢地好似玩得好開心咁添。

08.01.09

舊年年頭讀咗個英文既Course,不過讀完之後無再報喇,但有2個朋友就繼續讀, 所以我地依家既程度係一樣架喇, 所以今季再報名,尖尖原本都打算報讀架, 但佢報個班唔係同我地嗰班同一個時段,所以最後佢都唔報喇, 仲話以後都唔報呢間嘢添呀, 妳呀,快D揾吓第2間喇。

he..he..寫吓寫吓都好長添,實悶死大家喇, 係未來既1個月我都會幾忙架喇, 好多嘢都要準備吓。我會順便整理一張新屋禮物既清單俾大家揀吓架喇。