8.27 偷懶

原本打算今日返工既, 因為買咗D手信上大陸廠俾D同事食,咁諗住老細今日可以順便帶上去,但因為太攰同好眼瞓 所以最後都無返工,咁我就send SMS俾同事話佢知我今日休多一日息,點知我打打吓既時候又瞓著咗, 我又打得慢喇,又眼瞓, 瞓咗一陣就醒咗喇, 因為點都要係8點半前send.

爸爸知我攰,所以都無曹醒我,瞓到1點幾先起身,咁就同爸爸同咗飲茶,之後就一條友咁去咗做facial

咁就過咗一日喇。

8.26 台灣之行...最終回

今日係第4日係台灣喇, 玩埋今日就要返香港喇, 今日行程都唔多,因為導遊預留好多時間俾D人去買嘢。

Lunch去咗一間叫五船角既餐廳度食, 味道都ok喇,不過間餐廳好特別架,似一隻好舊好舊既船,呢個係餐廳既外貌

 

之 後去咗買手信,去到間手信店,我亞媽就要同佢同事個孫影相(即係導遊個仔),所以我都唔係試食好全部既嘢食, 不過我就攪咗烏龍喇, 因為我試食完綠豆糕,就以為有人鍾意食,我記得佢好似係好耐之前叫過我買,所以我就以為佢係鍾意食, 但佢又死口都話無,佢係唔鍾意食既, 攪到我有

 少少唔係幾好意思, 所以最後都俾咗少少肉干佢試吓。

今日有個行程係去士林官邸,嗰度都幾靚同舒服,好彩有D花睇吓,唔係我呢個行程都唔知點算好, 一心諗住去睇花,不過算喇, 咁都仲有其他景點我都未去過既,酒店都唔錯喇。

 

回程時, 因為都係食生果, 所以係機場都整咗個牛肉麵先上機

 

 回程時既飛機餐好D,因為係食新鮮既,唔錯唔錯。

總括來講呢個旅行都OK喇, 買咗好多野架。

10幾包肉干(要幫人買呀),護膚品, 20本漫畫,3本書,幾條大同細既毛巾,蕃石榴, 同埋食既手信,不過今次無影到相,因為我沖完涼媽媽已經執好曬D行李喇。

8.25 台灣之行...第3日(同一個日落)

今日係Free Day,所以可以瞓晏少少,8點幾就起身, 原本打算唔係酒店食早餐架, 但導遊話好好食, 所以最後都食咗。

今日要去既地方就多喇, 要去西門町買肉干同護膚品3大袋, 書局街買漫畫同書,原本仲打算去永康街食lunch,再去淡水睇日落同行街...先至返酒店既

好想去淡水睇日落, 因為周杰倫既不能說的...秘密好多場都係嗰度拍架,連間學校都係嗰度添(不過去唔到),不過咁風景又真係幾靚既,車程都唔算好遠(半個鐘車程)

淡水車站


好靚既...日落

原本諗住去食麻辣火鍋既, 不過媽媽唔係好想, 最後都係去咗食鼎太豐,不過都幾好食, 再去咗買碗芋買返酒店食。

今日真係行咗好多路呀,今晚要執行李喇, 明天就返香港喇。

8.24 台灣之行...第2日

今日既行程非常緊密, 由朝去到晚,攰死人呀...

食咗一個無咩食既早餐, 之後就出發去野柳(朋友問我係唔係去咗東平洲...真激死),今日既天氣就好好喇, 大家睇吓個天幾靚

 

去完野柳之後就上去九份,因為天氣好好,所以風景都好靚 

 仲食咗我最想食既牛肉麵同芋圓(唔俾大家睇喇,因為唔靚)


之後仲去咗好多景點...仲食咗我人生既第一口臭豆腐, 不過一D都唔好食, 所以都係食咗好少, 就掉咗喇, 就係呢度買架喇


再之後就去咗"木柵動物園",呢度我就未去過喇, 裡面都有好多動物架, 有樹熊獅子老虎...仲有好多好多, 我仲坐咗"惡作劇之吻"既觀光車呀...哈哈哈


仲見到企鵝呀

再之後就去咗士林夜市同行咗一陣街, 咁就返酒店喇, 最開心既都係唔洗住"X酒店",最衰Olivia之前講俾我知喇, 唔係我都唔知, 就唔洗成日都咁驚喇, 住既酒店仲唔錯添。

8.23 台灣...我來喇

終於都出發喇, 原本打算月初同媽媽同台灣旅行既,由於我太老定喇, 居然full曬,不過都好彩full曬,因為原本打算出發嗰日,台灣打風呀,但之前每日都上網睇吓台灣既天氣,因為我原本今次係打算去台灣睇吓花海,依家 台灣攪咗好多農場呀...花田呀...扮曬北海道咁,所以咪去睇吓(平過去日本喇)

今次係我第一次坐國泰機, 咁之前Olivia去旅行既時候,飛機餐係Order咗生果餐,所以我諗住今次都試吓(要留番個肚俾台灣既美食),不過呢....有少少失望

罐頭來架...

一 落機就坐車向朝咗我最想去既地方出發..."大溪花田農場", 去到首先食個lunch先(好普通), 食完lunch係附近行咗一陣, 之後去咗D.I.Y.香包, 原本天氣都幾ok架, 但做做吓香包既時候...唉...我最唔想既嘢就來咗喇, 係落大雨,所以最後都行去花海到睇花(不過我好懷疑,個團根本就唔會上去花海度...好唔開心呀), 之後就再去咗行程中既時令果園(完全無生果摘),好彩都有柸幾好味既蓄茄汁飲吓, 咁就返酒店喇。

今晚係住溫泉酒店,Dinner都係酒店食既,都幾好味,入到房間發現...嘩.....好大呀, 直情大過我間屋添呀,不過呢溫泉就麻麻喇,似似地熱水涼咁囉。

呢個就係傳說中的...溫泉

8.19 弟弟生日

弟弟下星期日生日,但因為我同媽媽去旅行,雖然嗰日就返香港,但都會好夜,所以就提早今日去一家人出去食飯

晏晝飲茶嗰陣弟弟仲發脾氣,攪到爸爸唔係幾開心,不過一排就無事喇,咁飲茶嗰陣就話不如去流浮山食海鮮,之前公司旅行去過食海鮮都OK(由其係炸生蠔),所以我地6點幾就一家人向流浮山前進。心情好期待

呢度食海鮮同西貢既一樣,都係自己係魚缸內揀。

等咗好耐......終於第一個餸

...炒聖子...好食

第三個餸...蒸飽魚...都OK大隻架,可以用刀叉食既

蘇眉(蒸魚腩)...呢個餸係我媽媽最鍾意叫既,每次食飯都提議叫,不過今次真係好好食

蘇眉(西芹炒斑球)...斑球呢...就林咗少少

油泡羅片...OK爽.不過真係貴咗D,無下次

最後一味...食神炒飯
原本叫海膽炒飯架,原來無,不過都唔諗住叫架喇, 不過爸爸話一場來到,試吓喎,所以再追加。

點解會第一個就好快去咗第三個呢

 

其實中間仲有一個X鹽賴X蝦,真係太太好食,即情唔記得影,因為一來到就食喇, 但呢個都幾貴架, 我地只係叫咗3隻,每隻可以切開3舊,要成$50一舊。

食完個油泡羅片,仲有一個餸既, 但情況同賴X蝦一樣,就係鹽焗蟹,又係超級好好食。有少少不足既就係炸生蠔售罄。

食到大家都好飽, 不過整體來講都幾好食,樣樣都好好味,價錢都OK,比西貢平D。

流浮山...I will be back.

8.18 飲茶

之前睇雜誌見到介紹又一城既"八月x"飲茶好似幾得咁, 上網睇食評都唔錯,咁就打算同屋企人今日下晝去試吓,去之前都知道貴架喇,不過諗住去試吓,貴少少都無所謂喇, 點知去到個度,細佬同爸爸又話呢樣貴,呢樣唔抵,有少少唔高興架, 咁我都係一心諗住食好D,貴都係一次半次,唔緊要喇, 最後攪到我發曬脾氣不過都係一陣就無事喇, 咁真係激激地架嗎...雖然食完又真係唔係幾好食既(無下次架喇),之後同爸爸媽媽係又一城行咗一陣, 再去咗貴價既百佳買生果(水蜜桃(2個$30同桃駁梨3個$20),都幾貴呀...不過又真係又甜又好味

8.14 運動

今日約咗尖尖一齊去跳健康舞,唔知係唔係太耐無跳呢, 今日跳咗一堂Fatburn+Yogo-Fit,一路跳已經一路話攰,之後仲要來多堂Yogo,玩完曬真係超攰,返屋企既腳步超慢,終於都返到屋企喇,完 全都唔想郁,原本聽日都打算去跳既,但...最後都決定唔去喇, 休息一日, 要留番D力星期四先再去玩。

真係要努力D先得喇, 同尖尖既距離拉遠咗好多呀

8.13 揀衫

今日約咗朋友陪佢去揀衫影婚紗相,原來係上星期五去揀既,但因為打風,所以改咗期,約咗朋友6點係九龍塘MTR等,原 本佢都有另一個朋友仔一齊來,但後來無又唔來,咁我地就3條友仔就一齊行去"蒙羅麗X",我地去到都係睇相先,好唔容易先揀到幾件出來,但點知仲耍有兩件 無貨...唉。

咁大間公司都會咁既。之後就開始換衫, 可能Sales姐姐經驗好,好快就換到一件,不過唔知係唔係件件都差唔多,所以都唔易揀, 有D係Sales姐姐揀既,所以真係有D係超超超"唔掂"

攪吓攪吓,好快就攪掂。我地就行咗去又一城Dinner"意粉屋",之後仲多咗個朋友一齊食, 我地4條友仔就叫"豬仔骨+煙三文魚生果沙律+普通size既pizza+2個湯+2柸檸茶",好似好少咁,但都食到幾飽。咁又過咗一日喇。

8.12 不能說的...秘密

今日同姐姐去咗元朗睇周董既"不能說的...秘密",雖然我唔係 佢既Fans,不過聽周圍既人講都話好睇,而且仲有早場(只需$30),所以就請姐姐一齊去睇,睇完之後,真係出乎意料,真係好睇,周董彈琴超勁,女主角 幾討好(識彈琴),拍得好靚(顏色,佈景,拍攝角度),呢歌超好聽

 

結局意想不到,又感人,所以整體對於我來講真係好睇,因為個結局關係,返到屋企仲專登上網search吓網友有咩發表,揾到太多喇, 都唔知邊個先啱,所以最後都決定放棄,就讓它這樣吧。之前有好多人讚佢唔似第一次做導演,之前仲覺得係D人俾面,但依家我都覺得係(雖然我唔係咩專業人 事)

未睇既各方好友,一定要去睇。

8.10 打風

今日颱風又回來,未打得成既時候又真係想打得成,但到真係預報3 點幾打8號,又唔係幾想,因為打風點都會有D麻煩事又要安排呢樣安排嗰樣先可以走人,但...今日真係煩到極點,大陸同事做野做得唔好,有手尾俾我跟,原 本打幾個電話安排吓就得,但...最後變成我星期日要送貨去機場俾人而且個風明明2點半就掛,有同事2點就可以開始走人,但我成3點半先走,真激死。我都 預咗打風,放工坐車點都會亂,所以我去總站上車,點都會好D(有位坐),所以算,因為今日車程足足多咗一倍,仲要坐滿車,司機都已經飛緊D站架,不過實在 太多人太多車,所以攪攪吓成5點半先落車,真無趣。

所以今次打風,對於我來講一D都唔好...

8.5 海洋公園爆咗

因為堂家姐由大陸來咗香港玩,今日我地13幾個人去海洋公園玩,好早就起咗身,本來真係滿心歡喜咁去架,因為我想睇盈盈同樂樂,但整個旅程實在令我太失望喇。去到門口大概11點。

第一個景點 : 熊貓館...排咗一個鐘,睇得3分鐘左右

第二個景點 : 覽車站...排咗半個鐘左右

第三個景點 : SKYVIEW餐廳...等咗9個字位

第四個景點 : 鯊魚館...最好彩,唔洗排

第五個景點 : 海洋館...排咗20分鐘

第六個景點 : M記買雪糕(唔洗我排)...半個鐘

以上既行程就係今次海洋公園遊既得著喇,實在太辛苦,咩都無玩到,成日係度行來行去同排隊再排隊,我未見過海洋公園咁多人架,直情爆咗。

遲D等無咁多人要再去玩先得

8.4 考試

個半月前報咗"SPACE"既日文入學試,已經半年無返日文,年紀又大,記性又唔係咁好,仲有每次拎本書出來溫都好眼瞓

 

由於太耐無讀,平時用既又唔同讀書,所以都有D辛苦。

今日終於去考試,雖然之前都有溫書,但都有好多唔識鬼叫自己之前俾錢讀既時候無好好咁讀咩,都唔知考唔考到添,但如果考唔到第3年,就要讀返第二年,但第二年既課程已經讀曬,不過都無計既,係唔識就係唔識,唯有讀多一年囉。不過我都希望可以考到喇

8.3. 辛勞的一天

終於等到星期五喇, 放埋今日工就可以放兩日假...

 

不過今日就要嚴陣以待喇, 因為今日有大老細係日本來公司,仲話會同我地香港既同事傾吓計,所以今日大家都好勤力喇預備,因為嗰衰人今日成日都係公司等

 

 同事間都整體D,有人打呔,有人化妝,萬眾其待既老細終於係下午4點到咗,不過好好彩最後佢都無同大家傾計,對於我來講...VERY GOOD,我老細就打咗我俾兩次,話如果傾完就CALL佢,要講佢知傾咗咩...

夜晚再去咗食BUFFET,因為大陸有親戚來,佢又話想去食,所以又食喇...

 

 之前都已經話幫佢地訂酒店,佢地又話唔洗,重以為佢地會自己攪掂,點知佢地只係諗住到時先算,最後又係攪到我食完飯由旺角搵到佐敦,一間一間咁對佢地搵,我費時全部人一齊行,我就叫佢地係一個地方等,我自己去搵,好耐都未試過行咁多路喇,香港都唔知有咩好玩

 

油尖旺,荃灣,灣仔,連天水圍既酒店都FULL曬,都唔知有無攪錯,最後係紅磡揾到一間好差既,但都要成千蚊,無計架鬼叫咁急咩。

返到屋企我對腳好似唔見咗咁,因為真係好攰