2011.02.04 首爾hea住遊 Day2

２０１１．０２．０４

原本今日係ｐｌａｎ左去南怡島同小法國
但我地太晏先起身，所以唔夠時間去２度
”小法國”唯有又留返下次囉
睇啲ｂｌｏｇ話由舊年１０月起去南怡島既火車無咗
改咗得返電車或士區有一班巴士直達（要預約）
我地覺得電車都好方便，又唔限時
電車都係一個鐘車程，好合理

首先去到清涼里轉京春線去清平轉的士去南怡島
我地為咗等有位坐既車，等多一班車
無無聊聊係咁月台影吓相
尋晚應該落雪，唔係邊得來咁白及軟綿綿

坐咗個幾鐘車，等半個鐘的士，再轉獨市船入島
不過都值得既，入到島好舒服
周圍都有火爐，有人吹色士風，遊客唔算好多
有雪景，感覺好休閒

呢個係冬季戀歌既重要場景之一
不過我無呢套戲，見人影我又影咁炸

條河結曬冰，不過唔係想像中咁凍
可能我地做足準備

我地係島上玩咗幾個鐘，原本想坐４點車直接出市區
但又唔知係邊度搭車，咪係停車場度等吓
等到４點幾都唔見，唯有搭返的士出車站落返電車
出市區時無位坐又人多，好迫好攰

終於都到市區，我地打算去入貨先

就係去首爾站既樂天超市

原本想係島上面食出面既飯盒，但揾唔到
剩係食咗啲小食，無正式食飯
所以一來到超市就揾咗ｆｏｏｄ　ｃｏｕｒｔ坐低食野先
呢個海鮮麵都唔錯，好鮮甜，不過有ｄ辣

呢個超市有幾層樓咁高，咩都有得賣，經濟三星店見到碩仔
忍唔住都要影返張相先，雖然係舊咗少少

入到超市食品部，見到好大個泡菜ｃｏｕｎｔｅｒ，好多款呀

行咗都２－３個鐘，買左一大車野，又食咗年糕
韓國超市同香港一樣無袋，不過會俾紙箱妳自己ｐｋ野
我地ｐｋ左２箱，仲要都幾重添
所以我地就決定返咗酒店放低ｄ野再出去食飯

原本想去網友推介既燒肉店食，點知又係新年關係，無開
唯有係附近揀間有開，個樣睇落又ｏｋ既食喇
好彩都揀到間好食既
前菜又好食，最鐘意個盤包生菜，食到好滿足

食飽飽後，姐姐係都要試吓韓國既炸雞
所以買咗一人份返酒店食，韓劇ｄ人好ｌｉｋｅ架
咁其實都好食既，但唔平囉，雞＋前菜就已經ｗ９０００
生果汽水另外加

食到咁飽，無即刻沖涼同瞓覺
一來今朝瞓到好晏，二來睇吓韓國啲綜藝節目先
雖然聽唔明